ބްރޯޑްކާސްޓިން ކޮމިޝަން (ބްރޯޑްކޮމް)ގެ ނާއިބު ރައީސްކަމުގެ މަގާމަށް އެ ކޮމިޝަނުގެ މެންބަރު މުހައްމަދު ފަޒީން ހަމަޖައްސައިފިއެވެ.

ބްރޯޑްކޮމްގެ ނާއިބު ރައީސަކަށް ފަޒީން ހަމަޖައްސާފައި މިވަނީ އެ ކޮމިޝަނުގެ ނާއިބު ރައީސްކަމުގެ މަގާމުގައި ކުރިން ހުންނެވި އަހްމަދު ގައިސް މަގާމުން އިސްތިއުފާ ދެއްވުމުންނެވެ.

ބްރޯޑްކޮމްގެ މެންބަރު ކަމަށް ފަޒީން އައްޔަން ކުރެއްވީ 2021ވަނަ އަހަރުގެ މާޗު މަހުގެ ހަތްވަނަ ދުވަހުއެވެ.

ފަޒީނަކީ ވިލާ ކޮލެޖުން ޑިޕްލޮމާ އިން އިންފޮރމޭޝަން ޓެކްނޮލޮޖީ ހާސިލުކުރައްވާފައިވާ ބޭފުޅެކެވެ. އޭނާ ނޫސްވެރިކަމުގެ ދާއިރާއާ ގުޅިވަޑައިގަތީ 2012 ވަނަ އަހަރުގެ މާޗު މަހު ޗެނަލް ނިއުސް މޯލްޑިވްސް (ސީ.އެން.އެމް)ގެ ސީނިއާ ޖާނަލިސްޓެއްގެ ގޮތުގައެވެ. އަދި، 2014 ވަނަ އަހަރުގެ ފެބުރުއަރީ މަހުން ފެށިގެން އަދާކުރައްވަމުން ގެންދެވީ ރާއްޖެ ޓީވީގެ ސީނިއާ ވީޑިއޯ ޖާނަލިސްޓްގެ މަޤާމެވެ.