ރާއްޖޭގެ 58ވަނަ މިނިވަން ދުވަހާއި ގުޅިގެން ހުޅުމާލޭގައި ހަވާ އަރުވާނެ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

މިއީ ރޭ އަރުވަން އޮތް ހަވާއެވެ. ނަމަވެސް ކުއްލި އަކަށް އިއްޔެ މާލޭ ސަރަހައްދުގައި ބަނޑުގައި ރިހުމާއި ހޮޑުލުމުގެ ރޯގާއެއް އިތުރުވުމުން ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ލަފާގެ މަތީން ރޭ ބާއްވަން ނިންމި ހަރަކާތްތައް ކެންސަލް ކުރިއެވެ.

އެމްއެންޑީއެފް އިން ބުނީ 58 ވަނަ މިނިވަން ދުވަހާއި ގުޅިގެން މިރޭ 21:30 ހާއިރު ހުޅުމާލެ ސެންޓްރަލް ޕާކްގައި ހަވާ އެރުވުން އޮންނާނެ ކަމަށެވެ. މި ހަރަކާތް ކުރިއަށް ދާނީ ގާތްގަނޑަކަށް 8 މިނެޓެއްހާއިރަށް ކަމަށްވެސް ބުންޏެވެ.

މިނިވަން ދުވަހާ ގުޅިގެން ރޭ ހުޅުވަން އޮތް މިނިވަން އުފާ ކާނިވާ ވެސް ރޯގާއާ ގުޅިގެން މިރެއަށް ވަނީ ފަސް ކޮށްފައެވެ.