މަންމާފުޅުގެ ޖަނާޒާގައި ބައިވެރިވުމުގެ ހުއްދައަށް ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޔާމީން އެދިވަޑައިގެންފައިނުވާ ކަމަށް ކަރެކްޝަނުން ބުނެފިއެވެ.

ޔާމީންގެ މަންމާފުޅު ފާތިމަތު ހަސަން އަވަހާރަވީ މިއަދު ހެނދުނުގެ ވަގުތެއްގައެވެ.

އެކަމަނާ އަވަހާރާވެފައި ވަނީ އަވަށްޓެރި ސްރީލަންކާގައި، އާލާސްކަފުޅާ އުޅުއްވާތާ ގިނަ ދުވަސްތަކެއް ފަހުންނެވެ.

އަވަހާރާވީ އުމުރުފުޅުން 86 އަހަރު ފުޅުގައެވެ.

ޖަނާޒާގައި ބައިވެރިވެވަޑައިގެންނުވުމުގެ ހުއްދަ އަށް ޔާމިންގެ ފަރާތުން އެދިވަޑައިގެންފައިވާނެތޯ ސުވާލު ކުރުމުން ކަރެކްޝަންގެ އޮފިޝަލަކު ވިދާޅުވީ އަދި މިހާތަނަށް އެދިފައިނުވާ ކަމަށެވެ. އެކަމަކު އާއްމު އުސޫލުގެ ދަށުން ޖަނާޒާގައި ބައިވެރިވުމުގެ ހުއްދަ ޔާމިނަށް ދެއްވާނެ ކަމަށް ވިދާޅުވިއެވެ.

ޔާމިންގެ ވަކީލުންގެ ޓީމުގައި ހިމެނިވަޑައިގަންނަވާ އަބްދުﷲ ޝިޔާޒް ކުރެއްވި ޓްވީޓެއްގައި ވިދާޅުވީ ވޭތުވެދިޔަ ދެމަހެއްހާ ދުވަހު ޔާމީން އެންމެ ބޭނުންފުޅުވެ ވަޑައިގެންނެވީ ޝަރީއަތުގެ މަރުހލާތައް އަވަހަށް ނިންމައި ޖަލު ހުކުމުން މިންޖުވެވަޑައިގެން، މަންމާފުޅުގެ އަރިހަށް ޒިޔާރަތްކޮށް ބައްދަލު ކޮށްލެވޭނެ ގޮތެއްވުން ކަމަށެވެ އެހެންނަމަވެސް، ޝަރުއީ ނިޒާމުގައި ހުރި ލަސްކަމުގެ ސަބަބުން މަންމާފުޅު އަވަހާރަ ވީއިރުވެސް އެ ފުރުސަތު އެމަނިކުފާނަށް ލިބިވަޑައިނުގެންނެވި ކަމަށް ވިދާޅުވިއެވެ.