ތ. ވޭމަންޑޫ ކައުންސިލްގައި އަންހެނުންނަށް ހާއްސަކޮށްފައިވާ ގޮނޑި ޕީޕީއެމުން ކާމިޔާބު ކޮށްފިއެވެ.

އިލެކްޝަން ކޮމިޝަނުން ބުނީ ސެޕްޓެންބަރު 23 ވާ ހޮނިހިރު ދުވަހު ބޭއްވުމަށް ތާވަލްކޮށްފައިވާ، ތ. ވޭމަންޑޫ ކައުންސިލްގެ އަންހެން މެންބަރު އިންތިހާބު ކުރުމަށް ބާއްވާ ބައި-އިލެކްޝަނަށް ކެންޑިޑޭޓުންގެ ގޮތުގައި ކުރިމަތިލުމަށް ދީފައިވާ މުއްދަތު ހަމަވިއިރު، ހަމައެކަނީ ކުރިމަތިލާފައިވަނީ ޕީޕީއެމުން ކަމަށެވެ.

އެ ޕާޓިގެ ފަރާތުނން ކުރިމަތިލީ ތ. ވޭމަންޑޫ، ކެނެރީވިލާ އާމިނަތު ނާއިލާއެވެ. ނާއިލާ އެކަނި ކުރިމަތިލާފައިވާތީ އޭނާވަނީ، ވޭމަންޑޫ ކައުންސިލް ގެ އަންހެން މެންބަރުކަމަށް، އިންތިޚާބުވެފައި ކަމަށް އީސީގެ ނައިބް ރައީސް އިސްމާއިލް ހަބީބް ކުރެއްވި ޓްވީޓެއްގައި ވިދާޅުވިއެވެ.

ހަބީބް ވިދާޅުވީ އެ ބައި-އިލެކްޝަނަށް ދެ އެޕްލިކޭޝަން ލިބިފައިވީނަމަވެސް، ފޯމާއެކީ ހުށަހަޅަންޖެހޭ ތަކެތި ކަނޑައެޅިފައިވާ ސުންގަޑި އަށް ހުށަނޭޅުމުގެ ސަބަބުން، މޯލްޑިވްސް ނޭޝަނަލް ޕާޓީގެ ހުށަހެޅުން އީސީ އިން ވަނީ ގަބޫލުކޮށްފައިނުވާ ކަމަށެވެ.