ސޯޝަލް މީޑިއާ އެކްޓިވްސްޓު ސިމްވާ ޓްވިޓާއަށް ދޫކޮށްލި ވީޑިއޯއެއްގައި ރަށުގެ ފަޅުތެރޭގައި ކަންނެލި އައިނު ހަރަކާތްތެރިވަމުންދާ ރީތި މަންޒަރު ފެނެއެވެ. ދާ އަޅައިގެން ކަންނެލި ބާނަން ރަށުގެ ފިރިހެންވެރިން "ހޭ ވައްޓާލާފައި" އުޅެމުންދެއެވެ. މުޅި ސަރަހައްދަށް ވެރިވެފައި އޮތް އުފާވެރިކަމުގެ ވީޑިއޯ ބަލާލުމުން އިހުސާސްވެއެވެ. ހީވަނީ ކަންނެލީގެ އީދެއް އައިހެނެވެ.

އިތުރު ވީޑިއޯއެއްގައި ފެންނަނީ ނ. މާފަރުގެ ކުދިވެރިން އިސްކޮޅަށްވުރެ ބޮޑު ކަންނެލި އަތުރާލާމުން މަންޒަރެވެ. އެއީ ގާތްގަނޑަކަށް 30 އާއި 35 ކިލޯ އާއި ދެމެދުގެ ކަންނެލިއެވެ.

މާފަރު ފަޅު ތެރެއަށް ވަން ކަންނެލި ބާނަނީ

"ޒުވާން ކުދިންތަކަކަށް ރަށުގެ އިރުމަތިން ކަޅު އައިނެއް ފެނުނީމަ ޑިންގީ އެއްގައި ގޮސް ބެލީ ކޯއްޗެއްތޯ، އެއީ ކަންނެލިކަން ޔަގީންވީމަ ތިނެއް ޖެހިހާއިރު ދާ އަޅައިގެން މަސައްކަތްފެށީ" މި މަސައްކަތުގައި އެންމެ އިސްކޮށް އުޅޭ ހަސަން އަބްދުﷲ "ހަތާވީސް" އަށް ކިޔައިދިނެވެ.

ހަސަން ބުނީ ދެ ބުރެއްގެ މަތިން ދާ އަޅައިގެން 400 އަށް ވުރެ ގިނަ މަސް ހިފިކަމަށެވެ. އެއީ ދިޔަވަރުވެސް ބޮޑުވެފައި އޮއްވާއެވެ. އެ ރަށުގެ 185 ގެއަށް، ކޮންމެ ގެއަކަށް ދެ ކަންނެލީގެ އުސޫލުން މަސް ބެހުމުގެ މަސައްކަތް މާފަރު ކައުންސިލުން މިހާރު ދަނީ ކުރަމުންނެވެ.

ރަށުގެ ފަޅުތެރެއިން 400 އަށްވުރެ ކަންނެލި ބާނާފައިވޭ

މަދުން ނަމަވެސް ކަންނެލި އައިނުތައް އެ ރަށުގެ ފަޅު ތެރެއަށް ވަދެއުޅެއެވެ. އެކަމަކު އާއްމު ގޮތެއްގައި މާފަރު ފަޅުތެރެއަށް ރިތް މަސް ވަނދެއުޅެއެވެ. އެހެން ހިފާ ރިތް މަސްވެސް ހަމަހަމައަށް ރަށުގެ ހުރިހާ ގެތަކަށް ބަހައެވެ. ހަސަން ބުނީ މިއީ 2000 ގެ އަހަރުތަކުގައި މިހާ ބޮޑެތި ކަންނެލިތައް ރަށުގެ ފަޅުތެރެއަށް ވަދެއުޅޭ ފުރަތަމަ ފަހަރު ކަމަށެވެ.