ސިފައިންނާއި ފުލުހުންގެ މުސާރަ ދެގުނަ ބޮޑުކުރައްވާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު މިރޭ ވައުދުވެވަޑައިގެންފިއެވެ.

ކެމްޕޭނު ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ ހުރިހާ ކަމެއްގައި ސިފައިންނަށް ފުލުހުންނަށް އަޅާލަން ޖެހޭ ކަމަށެވެ.

އިދިކޮޅު ޕީޕީއެމް/ޕީއެންސީ އިން އާޓްފިޝަލް ބީޗުގައި ބޭއްވި ޖަލްސާގައި ޑރ. މުއިއްޒު ވާހަކަދައްކަވަނީ: ހަތާވީސް ފޮޓޯ| އާދަމް ނަޒީރު

ނަމަވެސް މި ސަރުކާރުން އެ ދެ މުއައްސާސާއާ މެދު އިހާނެތިކޮށް ހިތާފައިވާ ކަމަށެވެ.

މި ސަރުކާރުގެ ފުރަތަމަ 100 ދުވަހުގެ ތެރޭގައި ސިފައިންނާ ފުލުހުންނަށް ދޭން ނިންމި ފްލެޓުގެ މަސައްކަތް އަދިވެސް ނުނިމޭ ކަމަށާއި ފްލެޓުތައް ހަވާލުކުރަން ގާތްވީމާ އެ ފްލެޓުތަކުގެ އަގު އިންތިހާއަށް ބޮޑުކޮށްފައިވާ ކަމަށެވެ.

މުއިއްޒު ދެއްވި ޔަގީންކަމަކީ އެ ދެ މުއްސަސާއިން ފްލެޓު ލިބުނު ފަރާތްތަކަށް ފްލެޓު ދައްކަން ޖެހޭ އަގު ޕީއެންސީގެ ސަރުކާރެއްގައި ތިން އަހަރު ދުވަހަށް ލަސްކޮށްދޭނެ ކަމަށެވެ.

ޕީޕީއެމް/ޕީއެންސީ އިން އާޓްފިޝަލް ބީޗުގައި ބޭއްވި ޖަލްސާގައި ޑރ. މުއިއްޒު (ކ) އަދި އެމަނިކުފާނުގެ ރަނިންމޭޓު ހުސައިން (ވ): ހަތާވީސް ފޮޓޯ | އާދަމް ނަޒީރު

ދައްކަން ޖެހޭ އަދަދުވެސް ބަހާލައިގެން ދެއްކޭނެ ލުއިގޮތެއް ހޯދައިދޭނެ ކަމަށް އޭނާ ވައުދުވެވަޑައިގެންނެވިއެވެ.

އޭގެ ފަހުން މުއިއްޒު ވިދާޅުވީ ފުލުހުންނާއި/ ސިފައިންގެ މުސާރަ މިހާރަށްވުރެ ބޮޑު ކޮށްދެއްވާނެ ކަމަށެވެ.

"ފުލުހުންނާއި ސިފައިންގެ މުސާރާ މިހާރު ހުރި މުސާރައަށްވުރެ ދެ ގުނަ ބޮޑުކޮށް ދޭނަން." މުއިއްޒު ވިދާޅުވިއެވެ.

އޭނާގެ ސަރުކާރުއެއްގައި އެންމެ އިސްކަމެއްދޭނީ ގައުމީ ފަހުރު ކަމަށްވާ ސިފައިންނާއި ފުލުހުންނަށް ކަމަށްވެސް މުއިއްޒު ވިދާޅުވިއެވެ.

"ކުޅޭ ކުޅޭ ބޯޅައެއްހެން ޖަހަން ގެންގުޅޭ ތަނަކަށް އެ ދެ ތަން ހެދިޔަ ނުދޭނަން" މުއިއްޒު ވިދާޅުވިއެވެ.