ދިވެހި ގައުމީ ދިދައަށްވުުރެ އުސްކޮށް އެއްވެސް ރަށެއްގައި ނަގާފައި ހުރި ސިޔާސީ ޕާޓީއެއްގެ ދިދައެއް ހުރެއްޖެ ނަމަ އެ ދިދައެއް ނަގައި ދިނުމަށް އިންތިހާބީ ރައީސް ޑރ. މުހައްމަދު މުއިއްޒުގެ އަރިހުން މާލޭގެ ޑެޕިއުޓީ މޭޔަރު އަހްމަދު ނަރީޝް އެދިވަޑައިގެންފިއެވެ.

އެކްސްގައި ނަރީޝް ރޭ ކުރެއްވި ޕޯސްޓެއްގައި ވިދާޅުވީ ސިޔާސީ ފޯރީގައި ރާއްޖޭގެ ރަށްރަށުގައި ދިވެހިރާއްޖޭގެ ގައުމީ ދިދައަަށްވުރެ އުސްކޮށް ނަގާފައިވާ ހުރިހާ ސިޔާސީ ޕާޓީތަކުގެ ދިދަތައް ނެގުމަށް މުއިއްޒުގެ ވެރިކަމުގެ ފުރަތަމަ ދުވަހު އެންގެވުމަށް އެދިވަޑައިގަންނަވާ ކަމަށެވެ.

"އަދި އޭގެ ފަހުން ދިވެހި ގައުމީ ދިދައަށްވުރެ އުސްކޮށް ދިވެހިރާއްޖޭގެ އެއްވެސް ތަނެއްގައި އެއްވެސް ބާވަތެއްގެ ދިދައެއް ނުނެގޭނެ ގޮތް ހަމަޖައްސަވައި ދެއްވާށެވެ،" ނަރީޝްގެ ޕޯސްޓުގައިވެއެވެ.

އޭނާ ވިދާޅުވީ ހަގީގީ މާނައިގައި "ދިވެހީންގެރާއްޖެ" އެއް ހޯދުމަށް ޕީޕީއެމް/ޕީއެންސީ ފަށާ ދަތުރުގައި އެއީ މުހިއްމު ކަމެއްގެ ގޮތުގައި ދެކޭ ކަމަށެވެ.

ރިޔާސީ އިންތިހާބުގައި ޕީޕީއެމް/ޕީއެންސީ ގެންގުޅުނު ޝިއާރަކީ "ދިވެހީންގެރާއްޖެ" ޝިއާރެވެ.