ދިވެހި ގައުމަށް ހަމަޖެހުމާއި ކުރިއެރުން ބޭނުންވާ ކަމަށާއި އެކަމަށްޓަކައި ހުރިހާ ފަރާތްތަކެއް ވެސް އެކަތިގަނޑަކަށް ވާން ޖެހޭ ކަމަށް އިންތިހާބީ ރައީސް، ޑރ. މުހައްމަދު މުއިއްޒު ވިދާޅުވެއްޖެއެވެ.

މިމަހުގެ 17ވަނަ ދުވަހު ކުރިޔަށް އޮތް ފަސް އަހަރަށް ދިވެހިރާއްޖޭގެ ރައީސުލްޖުމްހޫރިއްޔާކަމުގެ ހުވާ ކުރައްވާ ޑރ. މުއިއްޒު މިފަދައިން ވިދާޅުވީ ރާއްޖޭގެ 55ވަނަ ޖުމްހޫރީ ދުވަހާއި ގުޅިގެން ނެރުއްވި ކުރު ވީޑިއޯ މެސެޖެއްގައެވެ.

ސޯޝަލް މީޑިއާގެ އެކި ޕްލެޓުފޯމުތަކުގައި ޝެއާ ކޮށްފައިވާ އެ ވީޑިއޯގައި އިންތިހާބީ ރައީސް މުއިއްޒު ވަނީ މިހާ ހިސާބަށް ޖުމްހޫރީ ވެރިކަމެއް ގާއިމް ކޮށްދިން ހުރިހާ ރައީސުންނަށާއި ކެބިނެޓު ވަޒީރުންނާއި ވިޔަފާރިވެރިންނަށް ޝުކުރު އަދާ ކުރައްވާފައެވެ.

"މިހެން ގޮސް ގައުމު މިހިސާބަށް ގެނައުމުގައި ޖުމްހޫރީ ވެރިކަން މިހިސާބަށް ގެނައުމުގައި މަސައްކަތް ކޮށްދިން ހުރިހާ ފަރާތްތަކަަކަށް އަޅުގަނޑު ޝުކުރު ދަންނަވަން،" މުއިއްޒު ވިދާޅުވިއެވެ.

ރާއްޖޭގައި ދެވަނަ ޖުމްހޫރިއްޔާގެ ހަތްވަނަ ރައީސްކަމުގެ ހުވާ އަންނަ ހުކުރު ދުވަހު ކުރައްވާ ޑރ. މުއިއްޒު ވަނީ ޖުމްހޫރީ ނިޒާމު ރާއްޖެއަށް ގެނައުމުގައި ގިނަ ފަރާތްތަކެއް މަސައްކަތް ކުރެއްވިކަން ފާހަގަކުރައްވާފައެވެ.