ރާއްޖޭގައި ތިބި އިންޑިއާ ސިފައިންގެ އަދަދަކީ 89 ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

މީގެކުރިން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ ޕަބްލިކް ޕޮލިސީގެ އަންޓާ ސެކަރެޓަރީ މުހައްމަދު ފިރުޒުލް ވަނީ ރާއްޖޭގައި އޮތް އިންޑިއާގެ ޑޯނިއާ މަތިންދާ ބޯޓު ދުއްވުމަށް 25 ސިފައިނާއި ހެލިކޮޕްޓަރު ދުއްވުމަށް 26 ސިފައިންނާއި ދެ ވަނަ ހެލިކޮޕްޓަރު ދުއްވުމަށް 26 ސިފައިންނާއި މެއިންޓެއިނެންސްގެ ކަންކަން ބެލުމަށް އިތުރު ދެ ސިފައިން ތިބި ކަމަށް ވިދާޅުވެފައެވެ.

މިހާރު ރައީސް އޮފީހުގައި މިހާރު ކުރިޔަށްދާ ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް މުއިއްޒު ވަނީ ކުރިން ބެލި ބެލުމުން 77 އަށް އެރި ނަމަވެސް އިތުރަށް ބެލި ބެލުމުން އެ އަދަދު 89 އަށް އިތުރުވެފައިވާ ކަމަށެވެ.

"“އެ ވެސް ސާފެއް ނުވޭ. އެއަށް ވުރެ އިތުރު ވެސް ވެދާނެ. އަޅުގަނޑުމެންނަށް ހުރިހާ މައުލޫމާތެެއް ސާފުވި ކަމަކަށް ނުބެލެވޭ. މިއީ މިހާތަނަށް ފެނުނު ރޭންޖު. މިއަށްވުރެ ގިނަ ވެސް ވެދާނެ" ރައީސް ވިދާޅުވިއެވެ.