ދިވެހި މަސް ދޯންޏަކަށް ބޭރުގެ ސިފައިން އެރި ކަމަށް ބުނާ މައްސަލައެއް ބަލަމުން އަންނަ ކަމަށް އެމްއެންޑީއެފް އިން ބުނެފިއެވެ.

އެމްއެންޑީއެފް އިން މިއަދު ބުނީ ދިވެހިރާއްޖޭގެ ހާއްސަ އިގްތިސޯދީ ސަރަހައްދުގައި ވަނިކޮށް ދިވެހި މަަސްދޯންޏަަކަށް ބޭރުގެ އަސްކަރިއްޔާއަކަށް ނިސްބަތްވާ އުޅަނދެއްގެ ބޯޑިން ޓީމަކުން މަސްދޯންޏަށް އަރާފައިވާކަމުގެ ރިޕޯޓެއް ލިބިފައިވާތީ އެކަން އެމްއެންޑީއެފް އިން ބަލަމުން އަންނަ ކަމަށެވެ.

އަދި އެސަރަހައްދަށް އެމްއެންޑީއެފް ކޯސްޓްގާޑުގެ އުޅަނދެއް މިހާރު ދަތުރު ކުރަމުން އަންނަ ކަމަށްވެސް ބުންޏެވެ.

ސޯޝަލް މީޑިއާގައި ބައެއް ފަރާތްތަކުން ވަނީ އެ ދޯންޏަކީ އދ. މަހިބަދޫ އަށް ނިސްބަތްވާ "އަސުރުމާ 3" ނަމަކަށް ކިޔާ ދޯންޏެއް ކަމަށް ބުނެފައެވެ. އަދި އެ ދޯންޏަށް އެރީ އިންޑިއާގެ ކަނޑުގެ ސިފައިން ކަމަށް ވެސް ބުނެފައިވެއެވެ.