މާލޭގެ މަގުތަކަށް ކުނި އަޅައިގެން މިދިޔަ މަހުން ފެށިގެން 100 މީހަކު ޖޫރިމަނާކޮށްފިއެވެ.

މާލެ ސަރަހައްދުގައި ކުނި އެޅުމަށް ވަކި ތަނެއް ގާއިމް ކޮށްފައިވާއިރު އާއްމު ތަންތަނަށް ކުނި އެޅުމަކީ މަނާ ކަމެކެވެ. އަދި އެ މައްސަލަ ފުލުހުންނަށް ކައުންސިލުން ހުށަހެޅުމުން ކުނި އެޅި މީހަކު ފުލުހުންނަަށް ޖޫރިމަނާ ކުރެވޭނެއެވެ.

މާލެ ސިޓީ ކައުންސިލްގެ މޭޔަރު އާދަމް އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ އިއްޔެގެ ހަތަރު ގަޑިއިރުގެ ތެރޭގައި އެކަނިވެސް 22.5 ޓަނުގެ ކުނި ނަގާފައިވާ ކަމަށެވެ.

އަދި ވޭތުވެދިޔަ 16 ދުވަހު 222.5 ޓަނުގެ ކުނި ނެގިއްޖެ ކަމަށާއި އެއީ 25 ފޫޓުގެ 9 ކޮންޓެއިނަރުގެ ކުނި ކަމަށް އާޒިމް ފާހަގަކުރެއްވިއެވެ.

މާލޭގެ މަގުތަކުގައި މިހާ ގިނަ އަދަދަކަށް ކުނި ގިނަވެފައި މިވަނީ ރޯދައަށް ގެތަށް ސާފު ކުރުމުންނެވެ.