ރައީސުލްޖުމްހޫރިއްޔާ އޮފީހުގެ ޗީފް ސްޕޯކްސްޕާސަންގެ މަގާމަށް ދާދި ފަހަކުން އައްޔަން ކުރެއްވި ހީނާ ވަލީދު ބާއްވާ ފުރަތަމަ ނޫސްވެރިންގެ ބައްދަލުވުން މިއަދު އޮންނާނެ ކަމަށް ރައީސް އޮފީހުން ބުނެފިއެވެ.

ރައީސް އޮފީހުން ބުނީ ހީނާ ބާއްވާ ނޫސްވެރިންގެ ބައްދަލުވުން އޮންނާނީ މިއަދު ހެނދުނު 11 ޖަހާއިރު ރައީސް އޮފީހުގައި އޮންނާނެ ކަމަށެވެ.

އެ މަގާމަށް ހީނާ އައްޔަން ކުރެއްވީ މިމަހުގެ 23ވަނަ ދުވަހުއެވެ.

މިއީ، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕާސަންކަމުގެ މަގާމުގެ މަސްއޫލިއްޔަތާ އަންހެން ބޭފުޅަކު ހަވާލުވެވަޑައިގެންނެވި ފުރަތަމަ ފަހަރެވެ.

އެ މަގާމަށް އެންމެ ފުރަތަމަ މި ސަރުކާރުން އައްޔަން ކުރެއްވީ ނޫސްވެރިކަމުގެ ދާއިރާގެ ތަޖުރިބާކާރެއް ކަމަށް ޝަހީބެވެ. ނަމަވެސް އޭނާ އަށް ނޫސްވެރިންނާއި އާއްމުންގެ ފަރާތުން ބޮޑެތި ފާޑުކިޔުންތައް އަމާޒުވުމުން އެމަގާމުން ޝަހީބު ދުރުކުރިއެވެ.

އަދި ހީނާ އެމަގާމަށް އައްޔަން ކުރެއްވީ ރައީސް އޮފީހުގައި ތަރުޖަމާނަކު ނެތްތާ ދުވަސްތަކެއް ފަހުންނެވެ.