ކުލަ ހެދުމުގައި ތިބި ފުލުހަކަށް ބިރު ދައްކައި މާރާމާރީ ހިންގިކަމުގެ ތުހުމަތުގައި ހައްޔަރުކުރި މީހުންގެ ބަންދުގެ މުއްދަތު އިތުރުކޮށްފިއެވެ.

ފުލުހުން ބުނީ އެ މީހުން ވަޅިން ބިރު ދައްކައި ފުލުހުންނާ މާރާމާރީ ހިންގާފައި ވަނީ ރޭ 10:00 ހާއިރު ކަމަށެވެ. އެ މައްސަލާގައި ހައްޔަރުކުރީ ތިން މީހެކެވެ.

އެއީ 39 އަހަރުގެ ދެ މީހަކާއި 35 އަހަރުގެ މީހެކެވެ. މި މީހުންގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން އެމީހުންގެ ބަންދަށް ހަތް ދުވަސް ޖަހާފައިވާ ކަމަށް ފުލުހުން ބުންޏެވެ.

ފުލުހުން ބުނީ އެ މައްސަލަ މިހާރު އިތުރަށް ތަހުގީގު ކުރަމުން އަންނަ ކަމަށެވެ. އަދި މީހުން ހައްޔަރުކުރުމުގައި އަމަލުކުރި ގޮތާ މެދު ޝަކުވާތަކެއް ލިބިފައިވާތީ ފުލުހުންގެ ޕްރޮފެޝަނަލް ސްޓޭންޑަޑް ކޮމާންޑް އިން އެކަން ބަލަމުން އަންނަ ކަމަށް ފުލުހުން ބުންޏެވެ.