މި އަހަރު ރާއްޖޭން ހައްޖަށް ދާ ފުރަތަމަ ގުރޫޕް އިއްޔެ ފުރައިފިއެވެ.

ހައްޖުވެރިންގެ ދަތުރު ހަމަޖެހިފައިވަނީ ހަތަރު ގްރޫޕަކަށް ބަހަލާއިގެންނެވެ. ހައްޖުވެރިން ދަތުރު ކުރުމަށް ހަމަޖެހިފައި ވަނީ ސައުދީ އެއާލައިންގެ ފްލައިޓުންނެވެ.

އިއްޔެ ރާއްޖޭން 298 ހައްޖުވެރިން ވަނީ ފުރައިފައެވެ. ދެވަނަ ގްރޫޕް މިމަހުގެ ތިންވަނަ ދުވަހު ފުރާއިރު އެ ގްރޫޕް އިން 353 ހައްޖުވެރިން ފުރާނެއެވެ. ތިންވަނަ ގްރޫޕް ފުރުމަށް ހަމަޖެހިފައި ވަނީ މިމަހު ހަތެއްގައެވެ. އެ ގްރޫޕް އިން 339 ހައްޖުވެރިން ފުރާނެއެވެ.

އިސްލާމިކް މިނިސްޓްރީން މިއަދު "ހަތާވީސް" އަށް ހިއްސާކުރި މައުލޫމާތުތަކުން އެނގޭ ގޮތުގައި ހައްޖާޖީންގެ ފަހު ފްލައިޓު ފުރާނީ މިމަހު 10ވަނަ ދުވަހުއެވެ. އެ ފްލައިޓުން ފުރާނީ 150 ހައްޖާޖީންނެވެ.

ސާދަ ސަތޭކަ ސާޅީސް ފަސް ވަނަ އަހަރު ހައްޖަށް ގެންދިއުމަށް ދިވެހިރާއްޖެއަށް ލިބިފައިވަނީ ރަސްމީ 1000 ކޯޓާއެވެ.
ދިވެހިރާއްޖެއަށް ލިބޭ ރަސްމީ ކޯޓާއަށް މީހުން ޙައްޖަށް ގެންދާނީ މޯލްޑިވްސް ޙައްޖު ކޯޕަރޭޝަނުންނެވެ.