މަޖީދިއްޔާ ސްކޫލު ކައިރީގައި ހުންނަ ސްޓެލްކޯގެ ސަބްސްޓޭޝަނަކުން ކަރަންޓު ކޭބަލްތައް ބުރިކޮށް، ވަގަށް ނެގި މައްސަލައިގެ ތުހުމަތުގައި ހައްޔަރު ކުރި މީހާގެ ބަންދުގެ މުއްދަތު އިތުރުކޮށްފިއެވެ.

ފުލުހުން މިއަދު ބުނީ އެމީހާގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން، އެމީހާގެ ބަންދަށް 15 ދުވަސް އެ ކޯޓުން ޖަހާދީފައިވާ ކަމަށެވެ.

އެމީހާ ހައްޔަރު ކޮށްފައި ވަނީ އިއްޔެގެ ވަގުތެއްގައެވެ.

މިދިޔަ އަންގާރަ ދުވަހުގެ ހެނދުނު 6:12 ހާއިރު މަޖީދިއްޔާ ސްކޫލު ކައިރީގައި ހުންނަ ސަބްސްޓޭޝަނަކުން ވައްކަން ކުރި މައްސަލައެއް ފުލުހުންނަށް ރިޕޯޓުކުރިއެވެ. އެ ސަބްސްޓޭޝަނުގެ ކޭބަލްތައް ބުރިކޮށް ވަނީ ވަގަށް ނަގައިފައެވެ.