ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ ހުސްވެފައިވާ މެންބަރުކަމުގެ މަގާމަށް އިސްމާއީލް ހަބީބު އައްޔަން ކުރުމަށް ރައްޔިތުންގެ މަޖިލީހަށް ފޮނުވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ އަށް ރައީސް ޑޜ. މުހައްމަދު މުއިއްޒު ވަނީ ހުސްވެފައިވާ އެޗްއާރްސީއެމްގެ މެންބަރު ކަމުގެ މަގާމަށް ބޭފުޅަކު އައްޔަން ކުރަން ކުރި އިއުލާނަށް އިޖާބަ ދެއްވި ބޭފުޅުންގެ ތެރެއިން އެމަނިކުފާނަށް ފެނިވަޑައިގަންނަވާ ނަންފުޅެއް ފޮނުވައިފައެވެ.

ރައީސް ފޮނުއްވީ ހަމައެކަނި ހަބީބުގެ ނަންފުޅު އެކަންޏެވެ. ހަބީބު އެންމެ ފަހުން ހުންނެވީ އިލެކްޝަންސް ކޮމިޝަން (އީސީ)ގެ ކުރީގެ ނާއިބު ރައީސް ކަމުގެ މަގާމުގައެވެ.

އެކާވީސް އަހަރު ދުވަހު އިލެކްޝަންސް ކޮމިޝަނުގައި މަސައްކަތް ކުރެއްވި ހަބީބް އެ ކޮމިޝަނުން ވަކިވެވަޑައިގަތީ މިދިޔަ މާޗު މަހުގެ 13ވަނަ ދުވަހުއެވެ.