ރާއްޖެ އަށް ބިދޭސީ 23 އަންހެނަކު ގެނެސް އެމީހުން ލައްވާ ހަށިވިއްކުމުގެ ވިޔަފާރި ކުރަމުން ގެންދިޔަ ބަންގްލަދޭޝް މީހަކު ޑީޕޯޓު ކޮށްލައިފިއެވެ.

މޯލްޑިވްސް އިމިގްރޭޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ޑެޕިއުޓީ ޗީފް އިމިގްރޭޝަން އޮފިސަރު މުހައްމަދު ޝިފާން ވިދާޅުވީ އެމީހާ އަކީ ދިވެއްސަކާއި ކައިވެނި ކޮށްގެން ރާއްޖޭގައި އުޅެމުން ދިޔަ ބަންގްލަދޭޝްގެ ރައްޔިތެއް ކަމަށެވެ. އަދި އެމީހާ އަކީ 2019ވަނަ އަހަރުން ފެށިގެން ހަށި ވިއްކުމުގެ ވިޔަފާރި އަށް ރާއްޖެ އިން ބޭރުން އަންހެނުން ގެންނަމުން ދިޔަ މީހެއް ކަމަށް ވެސް ވިދާޅުވިއެވެ.

ޝިފާން ވިދާޅުވީ 2019 ވަނަ އަހަރުން ފެށިގެން 23 އަންހެނަކު އޭނާ ރާއްޖެ އެތެރެކޮށްފައިވާ ކަމަށެވެ. އަދި އެމީހުން ލައްވާ ހަށިވިއްކުމުގެ ވިޔަފާރި ކޮށްފައިވާ ކަމަށް ވިދާޅުވިއެވެ. ނަމަވެސް އެމީހާ މިހާރު ރާއްޖެ އިން ޑީޕޯޓު ކޮށްލާފައިވާނެ ކަމަށް ޝިފާން ވިދާޅުވިއެވެ.

މިފަހަކަށް އައިސް ފުލުހުންނާއި ގުޅިގެން އިމިގްރޭޝަނުން އަންނަނީ ރާއްޖޭގައި ގަވާއިދާ ހިލާފަށް އުޅެމުން އަންނަ ބިދޭސީން އަތުލައިގަތުމުގެ ހާއްސަ އޮޕަރޭޝަންތަކެއް ކުރިޔަށް ގެންދަމުންނެވެ.