މާލެ ސަރަހައްދުގެ ބްރިޖާއި ހައިވޭތައް ބޭނުންކުރާ އުޅަނދުތަކުން ޓޯލް ފީއެއް ނެގުމަށް ސަރުކާރުން ނިންމައިފިއެވެ.

ސަރުކާރުން އެކަން ނިންމިކަން އިއުލާކުރީ ޓްރާންސްޕޯޓް މިނިސްޓްރީން އިއުލާންކުރި "މާލެ ފަހި" ޕްރޮގްރާމް އިފްތިތާހު ކުރުމަށް ދަރުބާރުގޭގައި މިރޭ ބޭއްވި ރަސްމިއްޔާތުގައެވެ.

ރައީސް ޑރ. މުހައްމަދު މުއިއްޒާއި ކެބިނެޓް ވަޒީރުން ބައިވެރިވެވަޑައިގެންނެވި އެ ހަފްލާގައި އާންމުކުރި ވީޑިއޯ ޕްރެޒެންޓޭޝަނެއްގައި ބުނެފައި ވަނީ "ޓޯލް ފީ" ތައާރަފް ކުރުމަކީ އެ ޕްލޭންގައި ހިމެނޭ މުހިއްމު ކަމެއް ކަމަށެވެ. އަދި ދެމެހެއްޓެނިވި ގޮތެއްގައި ބްރިޖާއި ހައިވޭފަދަ ތަންތަން ބެލެހެއްޓޭނީ އެފަދަ ފީއެއް ނަގައިގެން ކަމަށް ވީޑިއޯ ރިޕޯޓުގައި ބުނެފައިވެއެވެ.

"ބްރިޖާއި ހައިވޭފަދަ ތަންތަން ބެލެހެއްޓުމަށް ކަމާގުޅުން ހުރި ދައުލަތުގެ ހުރިހާ އިދާރާތަކާ މަޝްވަރާކުރުމަށްފަހު ޓޯލް ފީ ކަނޑައަޅައި ތަންފީޒު ކުރުމާ ގުޅޭ ނިޒާމެއް ކަނޑައެޅުމާ ގުޅޭ ގޮތުން ހަދަންޖެހޭ ދިރާސާތައް ހެދުމުގެ މަސައްކަތް ކުރިއަށް އޮތް އޮގަސްޓްމަހުގެ ތެރޭގައި ފެށޭނެ،" ވީޑިއޯ ރިޕޯޓުގައިބުނެފައިވެއެވެ.

ސިނަމާލެ ބްރިޖު، އޮގަސްޓް 31، 2018ގައި ބޭނުންކުރަން ފެށި ފަހުން ވޭތުވެދިޔަ ހަ އަހަރު ދުވަހުގެ ތެރޭގައި ވެސް ޓޯލް ފީއެއް ނަގާފައިނުވެއެވެ. ބްރިޖު ބެލެހެއްޓުމުގެ މަސައްކަތް ކުރަނީ ޗައިނާއިންނެވެ.