ފަޅު އިމާރާތެއްގެ ގޮތުގައި ހުރި "އޯކިޑު ޕްލާޒާ"ގައި އަލިފާން ރޯވި މައްސަލާގައި ބައެއް މީހުން ހައްޔަރުކުރިކަން "ހަތާވީސް"އަށް އެނގިއްޖެއެވެ.

އެނގިފައިވާ ގޮތުގައި އެ މީހުން ހައްޔަރު ކުރީ "އޯކިޑު ޕްލާޒާ" ތެރެއިންނެވެ. ތިން ބުރިއަށް އިމާރާތްކޮށްފައިވާ ސަރުކާރުގެ ކުރީގެ ޝިޕިން ކުންފުނި، މޯލްޑިވްސް ނެޝަނަލް ޝިޕިން ލިމިޓެޑް (އެމްއެންއެސްއެލް)ގެ އެ އިމާރާތުގައި މީގެ ކުރިން ދެ ފަހަރެއްގެ މަތިން އަލިފާން ރޯވިއެވެ.

އެތަނުން ހައްޔަރު ކުރީ މަސްތުވާތަކެތި ބޭނުންކުރަން އެތަނަށް ވަދެ ތިބި ބައެއްކަން އެނގިފައިވެއެވެ.

އަލިފާންރޯވީ ސަރުކާރުގެ ކުރީގެ ޝިޕިން ކުންފުނި، މޯލްޑިވްސް ނެޝަނަލް ޝިޕިން ލިމިޓެޑް (އެމްއެންއެސްއެލް)ގެ އޯކިޑް ޕްލާޒާ އިމާރާތުގައި— ފޮތޯ/ ހަތާވީސް

އެތަނުން ހައްޔަރު ކުރި މީހުންނާ ބެހޭ ގޮތުން ފުލުހުންނާ ސުވާލު ކުރުމުން އަދި ޖަވާބެއް ނުލިބެއެވެ.

އެ އިމާރާތަކީ މަސްތުވާތަކެތި ބޭނުންކުރާ މީހުން އާންމުކޮށް ވަދެނުކުމެ ހަދާތަނެއް ކަމަށް އެ ސަރަހައްދުގައި ދިރިއުޅޭ އާންމުން ބުންޏެވެ.

"ހަތާވީސް"އާ ވާހަކަ ދައްކަވަމުން މާފަންނު ދެކުނު ދާއިރާގެ މެމްބަރު ރިފާއު ވިދާޅުވީ މަސްތުވާތަކެތި ބޭނުންކުރާ މީހުން އެތަނަށް ވަދެނުކުމެ ހަދާތީ، އެކަމުގެ ޝަކުވާ ސަރުކާރުގެ އިދާރާތަކަށްކޮށްފައިވާ ކަމަށެވެ.

އޯކިޑް ޕްލާޒާގައި ރޭ ފަތިހު ރޯވި އަލިފާން، ހެނދުނުވީއިރުވެސް ކޮންޓްރޯލެއް ނުވޭ-- ހަތާވީސް ފޮޓޯ/ ހުސައިން ހަސަން

އޯކިޑް ޕްލާޒާގައި ފަތިހު ރޯވި އަލިފާން ނިއްވާލީ މިއަދު އިރުއެރިފަހުންނެވެ. ކުންޏާއި ދުވަސްވީ ސާމާނުތަކުން ގޮނޑުވެފައިވާ އެތަނުގައި އަލިފާން ރޯވުމުން، ކައިރި ގެތަކުން ރޭ ފަތިހު މީހުން ހުސް ވެސްކުރިއެވެ. ނަމަވެސް އަލިފާން ކޮންޓްރޯލް ކުރެވުމުން އެ މީހުން ވަނީ ގެތަކަށް ވައްދާފައެވެ.