ލޯކަލް ގަވަރުމަންޓް އޮތޯރިޓީ (އެލްޖީއޭ)ގެ ޗީފް އެގްޒެކެޓިވް އޮފިސަރުގެ މަގާމަށް، މުހައްމަދު ނިމާލް އައްޔަން ކުރައްވައިފިއެވެ.

އޭނާ އެ މަގާމަށް އައްޔަން ކުރައްވާފައި ވަނީ ކުރިން އެ މަގާމުގައި ހުންނެވި ޑރ. މަރިޔަމް ޒުލްފާ އެ މަގާމުން އިއްޔެ ވަކި ކުރައްވަވާފައެވެ. ޒުލްފާ ވަނީ ފޮރިން މިނިސްޓްރީ އަށް ބަދަލު ކުރައްވަވާފައެވެ.

ނިމާލް މިއަދު އެ މަގާމަށް އައްޔަން ކުރެއްވީ އެކަމަށްޓަކައި ރައީސް އޮފީހުގައި އޮތް ރަސްމިއްޔާތެއްގައެވެ. މަގާމުގެ ލިޔުން ނިމާލާ ހަވާލު ކުރެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

އެލްޖީއޭގެ ސީއީއޯގެ މަގާމަށް ނިމާލު އައްޔަން ކުރެއްވުން: ފޮޓޯ | ރައީސް އޮފީސް

މީގެ ކުރިން ނިމާލް ވަނީ މާލެ އަތޮޅު، އަތޮޅު ކައުންސިލްގެ ރައީސްގެ މަގާމު އަދާކުރައްވާފައެވެ. އަދި ސްރީލަންކާގައި ހުންނަ ދިވެހިރާއްޖޭގެ ހައިކޮމިޝަންގެ މިނިސްޓާ ކައުންސެލަރު މަގާމާއި މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ)ގެ މެނޭޖިން ޑިރެކްޓަރުކަމުގެ މަގާމުވެސް ނިމާލު އަދާކުރައްވާފައިވެއެވެ.

މީގެ އިތުރުންވެސް ފެނަކަ ކޯޕަރޭޝަންގެ މެނޭޖިން ޑިރެކްޓަރުކަމުގެ މަގާމާއި، ޓޫރިޒަމް މިނިސްޓްރީގެ ނައިބުގެ މަގާމުވެސް ނިމާލް ވަނީ ފުރުއްވާފައެވެ.