ޗައިނާގެ ކުށްކުރާ ގުރޫޕްތަކާ ގުޅުން އޮންނަކަމަށް ތުހުމަތުކުރެވޭ ފިލިޕީންސްގެ ބަމްބަންގެ ކުރީގެ މޭޔަރ އެލައިސް ގުއޯ ފިލައިގެން ގައުމުން ބޭރަށް ދިޔަ މައްސަލަ ބަލަން އެގައުމުގެ ރައީސް އަންގަވައިފިއެވެ.

ފިލިޕީންސްގެ ރައީސް ފާޑިނަންޑް މާކޯސް ޖޫނިއަރ ވިދާޅުވީ އެލައިސް ގައުމު ދޫކޮށް ދިޔުމުގައި ބައިވެރިވި މީހުންގެ މައުލޫމާތު ހާމަކޮށް، އެމީހުންނަށް ހައްގު އަދަބު ދެއްވާނެކަމަށެވެ. އަދި އެލައިސްގެ ޕާސްޕޯޓް ކެންސަލްކުރުމަށްވެސް ވަނީ އަންގަވާފައެވެ.

އެލައިސްގެއާއި ޗައިނާގެ ކުށްކުރާ ގުރޫޕްތަކާ ގުޅުން އޮންނަކަމަށް ތުހުމަތުކުރެވޭ މައްސަލައިގައި ފިލިޕީންސްގެ ސެނެޓަށް ޖަވާބުދާރީވުމަށް އެންގުމުން އެލައިސް ވަނީ ފިލާފައެވެ.

ފިލިޕީންސްގެ ކަމާ ބެހޭ ފަރާތްތަކުން ބަމްބަން ސިޓީގައި ހުންނަ ސްކޭމްތައް ހިންގާކަމަށް ތުހުމަތުކުރެވޭ އިމާރާތެއް ރެއިޑްކުރިއިރު، އެތަނަކީ އެލައިސްއާ ގުޅުން ހުރި ތަނެއްކަމަށް މައުލޫމާތު ލިބުނުކަމަށް ކަމާ ބެހޭ ފަރާތްތަކުން ބުނެއެވެ.

ބަލަމުންދާ މައްސަލަތަކާ ގުޅިގެން އެލައިސް ހުރީ މަގާމުން ސަސްޕެންޑްކުރެވިފައެވެ.