ކ. ތިލަފުށީގައި ހުންނަ މެރީންޑޯ ވޯކްޝޮޕުގައި ރޯވި އަލިފާން، ތިން ގަޑިއިރުގެ މަސައްކަތުން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ނިއްވާލައިފިއެވެ.

މި ހާދިސާގައި އަނިޔާވި މީހަކަށް އައިޖީއެމްއެޗުން ފަރުވާ ދިނުމަށްފަހު ވަނީ ދޫކޮށްލާފައެވެ.

އެތަނުގައި އަލިފާން ރޯވީ މިއަދު ހެނދުނު 8 ޖެހިފަހުންނެވެ. އެ ވޯކްޝޮޕުގައި ރޯވި އަލިފާން ޖެހިގެން ހުރި އެހެން ތަންތަނަށް ވެސް ފެތުރުނެވެ. އިތުރަށް ފެތުރިގެން ނުދާވަރަށް، އަލިފާންގަނޑު ކޮންޓްރޯލް ކުރެވުނީ 10 ޖަހަން އުޅެނިކޮށެވެ. އަދި އަލިފާން އެއްކޮށް ނިއްވާލާފައި ވަނީ 11:04 ހާއިރު ކަމަށް އެމްއެންޑީއެފުން ބުންޏެވެ.

"މި ހާދިސާގައި މެރީންޑޯ ވޯކްޝޮޕާ އިންވެގެންހުރި ގުދަންތަކަށް އަލިފާނުގައި ބޮޑެތި ގެއްލުންތަކެއް ލިބިފައިވާއިރު، އެކަކަށް އަނިޔާވެގެން އައިޖީއެމްއެޗުގައި ފަރުވާ ދިނުމަށްފަހު، މިހާރު ދޫކޮށްލާފައިވާކަމުގެ ރިޕޯޓް ވަނީ ލިބިފައިވޭ،" އެމްއެންޑީއެފުން ބުންޏެވެ.