އިސްލާމްދީނާ ހިލާފު ނުވާ ގޮތަކަށް ހެދުން އަޅާނަމަ، އެމީހަކު އަޅާފައި ހުންނަ ހެދުމެއްގެ ސަބަބުން ވަޒީފާދިނުމުގައި އަދި ވަޒީފާ އަދާކުރުމުގައި އެއްވެސް ތަފާތެއް ކޮށްގެންނުވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު އެކްސްގައި ކުރެއްވި ޕޯސްޓެއްގައި މިއަދު ވިދާޅުވީ އަޅާ ހެދުމެއްގެ ސަބަބުން ވަޒީފާ ދިނުމުގައި ތަފާތު ކުރުން ގެނުވާ ގޮތަށް ކުރީގައި ހަދާ އަދި މިހާރުވެސް އަމަަލުކުރަމުންދާ ހުރިހާ ގަވާއިދުތަކާއި އުސޫލުތައް ބަދަލު ކުރުމަކީ ކުރަންޖެހޭ ކަމެއް ކަމަށެވެ. އަދި ވިދާޅުވީ އެކަން ކުރުމަށް ކަމާބެހޭ ފަރާތްތަކަށް ވާނީ އަންގާފައިވާ ކަމަށެވެ.

"އަޅުގަނޑުމެންގެ މި މުޖުތަމައު އަކީ ހުރިހާ މާނައެއްގައި އަދުލުވެރިކަމާއި އިންސާފުވެރިކަން އިސްކުރާ މުޖުތަމައު އަކަށް ހަދަން އެންމެން އަޒުމް ކަނޑައަޅަމާތޯ" ރައީސް ވިދާޅުވިއެވެ.

ރައީސް މިފަދައިން ވިދާޅުވެފައި މިވަނީ ދ. ހުޅުދެލީ މެޖިސްޓްރޭޓް ކޯޓުގެ ވަޒީފާއަކަށް ކުރިމަތިލީ މޫނު ބުރުގާ އެޅި އަންހެނަކު، މޫނު އަޅާތީ އޭނާ ޑިސްކޮލިފައި ކުރުމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ ނިންމުމާއި ގުޅިގެންނެވެ.