ޕްރޮސިކިއުޓަރު ޖެނެރަލް (ޕީޖީ) ގެ މަގާމުގައި ހުންނެވި ހުސައިން ޝަމީމް މަގާމުން ވަކި ކުރެއްވުމުގެ ޖަލްސާ ކުރިޔަށް ދަނިކޮށް، އެ މަގާމުން ޝަމީމް އިސްތިއުފާ ދެއްވައިފިއެވެ.

ރައްޔިތުންގެ މަޖިލީހަށް ހުށަހެޅިފައިވާ ޕީޖީ ހުސައިން ޝަމީމްގެ އިތުބާރު ނެތް ކަމަށް މައްސަލާގައި، ޝަމީމް ވަކިކުރުމަށް ޖުޑީޝަރީ ކޮމެޓީން މިއަދު ވަނީ ފާސްކޮށްފައެވެ.

ޕްރޮސިކިއުޓަރު ޖެނެރަލްގެ މަގާމު ހުސްވުމާ ގުޅިގެން ޕްރޮސިކިއުޓަރު ޖެނެރަލްގެ ގާނޫނުގެ ހަތް ވަނަ މާއްދާގެ (ބ) ގެ ދަށުން، ޕްރޮސިކިއުޓަރު ޖެނެރަލްގެ މަސްއޫލިއްޔަތުތަކާ މިހާރު ހަވާލުވެވަޑިގެން ހުންނެވީ ޑެޕިއުޓީ ޕްރޮސިކިއުޓަރު ޖެނެރަލް އަލްއުސްތާޒު މަހުމޫދް ސަލީމެވެ.

އަދި މިރޭ 21:00އަށް މަޖިލީހުގެ ޖަލްސާއެއް އެޖެންޑާކޮށް އެ ޖަލްސާ ވަނީ ފަށައިފައެވެ. ޝަމީމް އިސްތިއުފާ ދެއްވީ ޖަލްސާ ފެށި ފަހުންނެވެ.

ޕީޖީގެ އިތުބާރު ނެތްކަމަށް ހުށަހަޅާ ސަބަބު:

  • ކުރީގެ ޓޫރިޒަމް މިނިސްޓަރު އަލީ ވަހީދަށް ކޮށްފައިވާ ޖިންސީ ކުށުގެ ދައުވާތައް ފައިލްކުރުން
  • ކުރީގެ ޔޫތު މިިސްޓަރު އަހުމަދު މަހުލޫފު އެ މަގާމުގައި ދެމި ހުރުމަށް އެ މައްސަލަ ފައިލް ކުރުން
  • ސަފާރީ ރޭޕް ކެސްގެ މައްސަލާގައި އެމްޑީޕީއާ ގުޅުން އޮންނަ ފަރާތެއް ހިމެނޭތި އިސްތިއުނާފް ނުކުރުން
  • ނިލަންދޫ ދާއިރާގެ ކުރީގެ މެމްބަރު އަލީ ރިޒާގެ މައްޗަށް ކުރި ހިއުމަން ޓްރެފިކިންގެ ދައުވާ އަނބުރާ ގެންދިއުން
  • ބަނގުރަލާ ގުޅޭ 77 މައްސަލަ އަނބުރާ ގެންދިއުން
  • އެއް ޖިންސުން ގުޅުން ހިންގުމާ ގުޅޭ 13 މައްސަލައެއް އަނބުރާ ގެންދިއުން
  • ވެންޓިލޭޓަރު މައްސަލާގައި ދައުވާ ނުކުރުން

ޝަމީމް މަގާމުން ވަކިކުރަން އުޅޭ މައްސަލައާ ގުޅޭ ގޮތުން ޝަމީމް ޕީޖީ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ މަގާމުން ވަކިކުރަނީ މަސައްކަތެއް ނުކޮށްގެނެއް ނޫން ކަމަށާއި އެ ނިންމެވުމަކީ ސިޔާސީ ނިންމުމެއް ކަމަށެވެ.

ޝަމީމް ވިދާޅުވީ އޭނާ މަގާމުން ވަކިކުރާތީ ޝަކުވާއެއް ކުރަން ބޭނުންނުވާ ކަމަށާއި އިތުބާރުގެ އެފަދަ މައްސަލަތައް ހިނގާ ގޮތް އެންމެންނަށް ވެސް އެނގޭނެ ކަމާށެވެ.