ގަވާއިދާ ހިލާފަށް މާލެ ސަރަހައްދުގައި އުޅެމުން އަންނަ ބިދޭސީން ހޯދުމަށް މޯލްޑިވްސް އިމިގްރޭޝަނުން ބޮޑު އޮޕަރޭޝަނެއް މިއަދު ފަށައިފިއެވެ.

މި އޮޕަރޭޝަނާ ގުޅޭ މައުލޫމާތު ހިއްސާ ކުރުމަށް އިމިގްރޭޝަނުން އެކްސްގައި ކޮށްފައިވާ ޕޯސްޓެއްގައި މިއަދު ބުނީ މާލެ ސަރަހައްދުގައި ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅެމުންދާ ބިދޭސީން ބަލައި ފާސްކުރުމަށް ހާއްސަ ހަރަކާތެއް ކުރިޔަށްދާ ކަމަށެވެ.

އެ ހަރަކާތުގައި 211 އިމިގްރޭޝަން އޮފިސަރުން ބައިވެރިވާނެ ކަމަށް އިމިގްރޭޝަނުން ބުންޏެވެ. އަދި 52 ގްރޫޕަކަށް ބަހާލައިގެން ކުރިއަށްގެންދާ އެ ހަރަކާތުގައި މާލެ ސަރަހައްދުގެ 26 ޒޯނެއް ބަލައި ފާސްކުރުމަށް ހަމަޖެހިފައިވާ ކަމަށްވެސް ބުންޏެވެ.

"މި ހަރަކާތުގެ މަގުސަދަކީ މާލެ ސަރަހައްދުގައި ގަވާއިދާ ހިލާފަށް ކުދި އަދި މެދު ފަންތީގެ ވިޔަފާރި ކުރަމުން އަންނަ ބިދޭސީން ދެނެގަނެ، އެފަރާތްތަކަށް އިމިގްރޭޝަނަށް ހާޒިރުވުމަށް އަންގައި، އަދި ގަވާއިދާ ހިލާފަށް ބިދޭސީން ލައްވައި މަސައްކަތްކުރުވާ ދިވެހިންނަށް ލިޔުމުން ނަސޭހަތްދިނުން،" އިމިގްރޭޝަނުން ބުންޏެވެ.

ގަވާއިދާ ހިލާފަށް އުޅޭ ބިދޭސީން ހޯދުމަށް ކުރިޔަށް ގެންދާ އޮޕަރޭޝަނުގައި ބައިވެރިވާ އިމިގްރޭޝަން އޮފިސަރުންނާ ކޮންޓްރޯލާ ވާހަކަދައްކަވަނީ --- ފޮޓޯ | އިމިގްރޭޝަން

އެ ޕޯސްޓުގައި އިތުރަށް ބުނީ އެ ހަރަކާތުން ހޯދޭ މައުލޫމާތުގެ އެހީގައި އެ މައްސަލައާ ގުޅިގެން މިވަގުތު މާލެ ސަރަހައްދުގެ ހާލަތު ދެނެގަނެވިގެން ދާނެ ކަމަށެވެ.

މިދިޔަ އަހަރުގެ ނޮވެމްބަރު މަހުގެ 17ވަނަ ދުވަހުން ފެށިގެން މިމަހުގެ 25ވަނަ ދުވަހުގެ ނިޔަލަށް 257 ތަނަކަށް ރެއިޑްކޮށް 3،322 ބިދޭސީން ފުރުވާލެވިފައިވާ ކަމަށް މޯލްޑިވްސް އިމިގްރޭޝަނުން ވަނީ ހާމަކޮށްފައެވެ.