މަޝްހޫރު ދިވެހި ސެފް މަހާ ނަސީރު، ތައިލެންޑުގެ ބެންކޮކްގައި ކުރިއަށްދާ "ވޯލްޑް ޖޫނިޔާ ސެފް ޗެލެންޖް 2024"ގައި ފަނޑިޔާރުކަން ކޮށްފިއެވެ.

އަންނަ ހޮނިހިރު ދުވަހުގެ ނިޔަލަށް ކުރިއަށްދާ މި މުބާރާތަކީ ގިނަ ބައިނަލްއަޤްވާމީ ސެފް ފަނޑިޔާރުން ބައިވެރިވާ، 12 ގައުމެއްގެ ސެފް ޓީމުތަކާއި ތައިލެންޑުގެ ހަތަރު ޓީމެއް ވާދަކުރާ މުބާރާތެކެވެ.

ދިވެހިރާއްޖޭގެ އިތުރުން މި މުބާރާތުގައި ބައިވެރިވާ ގައުމުތަކުގެ ތެރޭގައި ސިންގަޕޫރު، މެލޭޝިއާ، ދެކުނު ކޮރެއާ، މޮންގޯލިއާ، ކެމްބޯޑިއާ، ވިއެޓްނާމް، އިންޑޮނޭޝިއާ، ޗައިނާ، އެމެރިކާ، އޮސްޓްރޭލިއާ އަދި ގްރީސް ހިމެނެއެވެ.

މި މުބާރާތަކީ ގިނަ ބައިނަލްއަޤްވާމީ ސެފް ފަނޑިޔާރުން ބައިވެރިވާ މުބާރާތެއް

ސެފް މަހާ އަކީ ކުރީގެ ޝެފްސް ގިލްޑް އޮފް މޯލްޑިވްސްގެ ސެކްރެޓަރީ ޖެނެރަލްކަން ކޮށްފައިވާ ފަރާތެކެވެ. މިހާރު މަހާ މަސައްކަތް ކުރަމުން އަންނަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)ގެ ބޯޑް މެމްބަރެއްގެ ގޮތުގައެވެ.

ފާއިތުވި އަހަރުތަކުގެ ތެރޭގައި މަހާ ވަނީ ކަލިނަރީގެ ދާއިރާއިން ގައުމީ އަދި ބައިނަލްއަގުވާމީ އެތައް އެވޯޑުތަކެއް ހާސިލްކޮށްފައެވެ.

މަހާ އަކީ މިހާރު ރާއްޖޭގައި ތިބި މަދު އަންހެން އެގްޒެކެޓިވް ޝެފުންގެ ތެރެއިން އެކަކެވެ. އަދި ރާއްޖެއިން މާސްޓާ ޝެފުގެ ލަގަބު ލިބުނު ފުރަތަމަ ދިވެހި ޝެފެވެ.