މިދިޔަ ބުރާސްފަތި ދުވަހުގެ ރޭ ހުޅުމާލޭގައި ބާރު ސްޕީޑުގައި ދުއްވާފައި ދިޔަ ރޭސިން ކާރެއްގައި ޖެހިގެން އުމުރުން 23 އަހަރުގެ ހަސަން ސަމާހް ނިޔާވި އެކްސިޑެންޓާ ގުޅާ މައުލޫމާތެއް ދީފައި ނުވާނެ ކަމަށް ފުލުހުން ބުނެފިއެވެ.

އެމްވީ ކްރައިސިސް ނަމަކަށް ކިޔާ ޓެލެގްރާމް ގްރޫޕަކުން ވަނީ ސަމާހް ދުއްވި ސައިކަލު ވަންވޭއާ އިދިކޮޅަށް ދިޔަކަން ފުލުހުންގެ ތަހުގީގުން ހާމަވެފައިވާ ކަމަށް ބުނެފައެވެ. އެއާއެކު ގިނަ ބަޔަކު އަންނަނީ އެ އެކްސިޑެންޓުގައި ނިޔާވި ސަމާހު ކުށްވެރިކޮށް ވާހަކަދައްކަމުންނެވެ.

"ހަތާވީސް" އިން އެކަމާއި ގުޅޭ ގޮތުން ސުވާލު ކުރުމުން ފުލުހުން ބުނީ އެ މައްސަލަ ދަނީ ތަހުގީގު ކުރަމުން ކަމަށެވެ. ނަމަވެސް އެ ތަހުގީގާ ގުޅޭ އެއްވެސް މައުލޫމާތެއް އެއްވެސް ފަރާތަކަށް ހިއްސާ ކޮށްފައި ނުވާނެ ކަމަށްވެސް ބުންޏެވެ.

ބާރު ސްޕީޑުގައި ދުއްވާފައި ސްޕޯޓްސް ކާރެއް، ސައިކަލެއްގައި ޖެހި ވިއްސައިގެން ގޮސް، ބޮލަށް ލިބުނު ޒަހަމްތަކަށް ފަރުވާދެމުންދަނިކޮށް ސަމާހް ނިޔާވީ ހޮސްޕިޓަލަށް ގެންދިޔަތާ ކުޑަވަގުތު ކޮޅެއްގެ ތެރޭގައެވެ.

ފުލުހުން ބުނީ އެކްސިޑެންޓާ ގުޅިގެން ސ. ހިތަދޫ، ވައިލެޓްފެހި، މުހައްމަދު ވިސާމު ސިދުގީ، 26، ހައްޔަރުކޮށްފައިވާ ކަމަށެވެ. އޭނާގެ ބަންދާމެދު ގޮތެއް ނިންމުމަށް މިދިޔަ ހުކުރު ދުވަހު ކޯޓަށް ގެންދިއުމުން ޝަރީއަތް ނިމެންދެން އޭނާ ބަންދުކޮށްފައިވާ ކަމަށް ފުލުހުން ބުންޏެވެ.