ފެން ބައުޒަރެއްގައި ސައިކަލަކުން ޖެހި ޒުވާނެއްގެ ބޮލަށް އަނިޔާވެއްޖެއެވެ.

މި ހާދިސާއެއް ހިނގާފައި ވަނީ ހުޅުމާލޭގެ ފޭސް އެކަކާއި ދޭއް ގުޅޭ ބްރިޖުގައެވެ. ފުލުހުން ބުނީ ލޮރީއަކާއި ސައިކަލެއް ޖެހި އެކްސިޑެންޓެއް ހިނގައިގެން ފުލުހުން ހަރަކާތްތެރިވެފައިވާ ކަމަށެވެ.

އެ ހާދިސާގައި އަނިޔާވެފައި ވަނީ ސައިކަލުގައި އިން 24 އަހަރުގެ ޒުވާނާ އަށް ކަމަށް ފުލުހުން ބުންޏެވެ. އަދި އޭނާގެ ބޮލަށް އަނިޔާވުމުން ހޮސްޕިޓަލަށް ގެންގޮސްފައިވާ ކަމަށްވެސް ބުންޏެވެ.

މީޑިއާތަކުގައި އާއްމުވެފައިވާ ބައެއް ފޮޓޯތަކުން ފެންނަނީ ބައުޒަރުގައި ޖެހި ސައިކަލު ވެއްޓިފައިވާ މަންޒަރެވެ. އަދި ގިނަ އަދަދެއްގެ ފެން ވެސް ބައުޒަރުން ފައިބާފައި ހުރި މަންޒަރު ފެނެއެވެ.