މިދިޔަ ޖުލައި މަސް ތެރޭގައި މާލޭގެ ގެއަކަށް ދިވެހި ފިރިހެނަކު ވައްދާ އެމީހާ އަށް ބިރު ދައްކާ ބަރަހަނާ ކުރުމަށްފަހު، ފޭރުނު މައްސަލާގައި ތިން މީހަކަށް ދައުވާ ކުރަން ފޮނުވައިފިއެވެ.

2024 ޖުލައި 24 ވަނަ ދުވަހުގެ ވަގުތެއްގައި، މއ. މަސްފަން ގެއަށް ދިވެހި ފިރިހެނަކު ވައްދައި، އެމީހާއަށް ވަޅިން ބިރުދައްކައި އޮރިޔާންކޮށް، އަނިޔާކޮށް، އޭނާގެ މޯބައިލް ފޯނުއަތުލައި އޭނާގެ ބެންކު އެކައުންޓުން ފައިސާ ޓްރާންސްފާ ކުރުވައި އަދި އޭނާގެ ކޭޝްކާޑު ބޭނުންކޮށްގެން އޭޓީއެމް އިން ފައިސާ ނަގާފައިވާ ކަމަށް ތުހުމަތުކުރެވޭ މައްސަލައިގެ ތަހުގީގު ނިންމައި ދައުވާ ކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށް ފުލުހުން ބުންޏެވެ.

އެ މައްސަލައާ ގުޅިގެން ކޯޓު އަމުރެއްގެ ދަށުން ތިން މީހުން ހައްޔަރުކޮށް، އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް އަމުރުކޮށްފައިވެއެވެ.

އެ މައްސަލައިގެ ތަހުގީގު ނިންމައި، މއ. މަސްފަން، އުމުރުން 43 އަހަރުގެ އާއިޝަތު އާއި ހަމަ އެގޭ އުމުރުން 27 އަހަރުގެ މުހައްމަދު ރީހާން އަދި ސ. ހިތަދޫ ސޯމާގެ އުމުރުން 35 އަހަރުގެ ޝަފީގު އިބްރާހީމްގެ މައްޗަށް ދައުވާކުރުމާ މެދު ގޮތެއް ނިންމައިދިނުމަށް އެދި ޕީޖީ އޮފީހަށް ފޮނުވާފައި ވަނީ މި ސެޕްޓެންބަރު މަހުގެ 9 ވަނަ ދުވަހުއެވެ.