ރާއްޖެ ސަރަހައްދަށް ހުޅަނގު މޫސުމުގެ ބާރު ގަދަވެފައި ވާތީ ކުރިޔަށް އޮތް ފަސް ދުވަހު ރާއްޖެ އަށް މޫސުން ގޯސް ވާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން ބުނެފިއެވެ.

މެޓުން މިއަދު ބުނީ މެދު ރާއްޖޭގެ ރަށްތަކަށް އާއްމު ގޮތެއްގައި ޖެހޭ ވައި ގަޑިއަކު 15 މޭލާއި 25 މޭލު ބާރު މިނުގައި ޖެހޭނެ ކަމަށް ލަފާ ކުރެވޭ ކަމަށެވެ. އަދި ދެކުނުގެ ރަށްތަކަށް 13 މޭލާއި 23 މޭލު ބާރު މިނުގައި ޖެހޭނެ ކަމަށް ލަފާ ކުރެވޭ ކަމަށްވެސް ބުނެފައިވެއެވެ.

ނަމަވެސް ވިލާގަނޑުގައި ވައިޖެހޭ މިންވަރު އިތުރުވާނެ ކަމަށާއި އެގޮތުން ވިލާގަނޑުގައި ގަޑިއަކު 45 މޭލާއި 55 މޭލު ބާރު މިނުގައި ވައިޖެހޭނެ ކަމަށް ލަފާކުރެވޭ ކަމަށް މެޓުން ބުންޏެވެ.

"އެހެންކަމުން ރާއްޖޭގެ ހުރިހާ އަތޮޅުތަކެއްގެ ކަނޑުތައް ވަރަށް ގަދަވާނެ ކަމަށް ލަފާކުރެވެއެވެ،" މެޓުން ބުންޏެވެ.

މެޓުން ބުނީ ގަދަވަޔާއެކު ބޯކޮށް ވާރޭ ވެހޭނެ ކަމަށްވެސް ލަފާ ކުރެވޭ ކަމަށެވެ. އަދި ދިޔަވަރު ބޮޑުވާ ގަޑިތަކުގައި އުދަ އެރުމަކީ ވެސް އެކަށީގެންވާ ކަމެއް ކަމަށްވެސް ބުނެފައިވެއެވެ. އެހެންކަމުން ހުރިހާ ފަރާތްތަކަކުން މޫސުމަށް ސަމާލުކަން ދިނުމަށް މެޓުން ވަނީ އިލްތިމާސް ކޮށްފައެވެ.