މާލޭގެ ފިހާރައެއްގެ ތެރޭގައި މިދިޔަ ހުކުރު ދުވަހު މާރާމާރީ ހިންގައި، ތޫނު އެއްޗަކުން ހަމަލާދީ މީހަކު ޒަހަމްކޮށްލި މައްސަލާގައި މީހަކު ހައްޔަރުކޮށްފިއެވެ.

ކޯޓު އަމުރެއްގެ ދަށުން ހައްޔަރުކޮށްފައި ވަނީ މއ. މަސްފަން، މުނީޒް، 37، އެވެ. މިދިޔަ ހޮނިހިރު ދުވަހު އޭނާ ހައްޔަރުކޮށް، ބަންދާމެދު ގޮތެއް ނިންމުމަށް ކޯޓަށް ގެންދިއުމުން ކޯޓުން ވަނީ އޭނާ ޝަރީއަތް ނިމެންދެން ބަންދުކުރުމަށް އަމުރުކޮށްފައެވެ.

މިދިޔަ ހުކުރު ދުވަހުގެ ރޭ މުނީޒް މާރާމާރީ ހިންގީ ދިލްބަހާރުމަގުގައި ހުންނަ ފިހާރައެއްގެ ތެރޭގައެވެ. އެ ފިހާރަ ތެރޭގައި ތޫނު އެއްޗަކުން މީހަކަށް ހަމަލާދީ ޒަހަމްކޮށްލާފައިވެއެވެ. ނަމަވެސް އޭނާއަށް ޒަހަމްވި މީހާއަށް ސީރިއަސް އަނިޔާތަކެއް ނުވެއެވެ.