މިއަދުވެސް ރާއްޖޭގެ އެކި ހިސާބުތަކަށް މޫސުން ގޯސް ވާނެ ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން ބުނެފިއެވެ.

މެޓުން މިއަދު ބުނީ އެކި ހިސާބުތަކަށް ވިއްސާރަ ކުރާނެ ކަމަށެވެ. އަދި ބުނީ ގުގުރުން ވެސް އެކަށީގެންވާ ކަމަށެވެ. މީގެއިތުރުން ވައިވެސް ގަދަވާނެ ކަމަށް ލަފާ ކޮށްފައިވެއެވެ.

އުތުރާއި މެދުރާއްޖޭގެ ރަށްތަކަށް ގަޑިއަކު 13 މޭލާއި 23 މޭލާއި ދެމެދުގެ ބާރު މިނެއްގައި ވައި ޖެހޭނެ ކަމަށް ބުނެފައިވެއެވެ. އަދި ދެކުނުގެ ރަށްތަކަށް ގަޑިއަކު 8 މޭލާއި 18 މޭލާއި ދެމެދުގެ ބާރު މިނެއްގައި ވައިޖެހޭނެ ކަމަށް ލަފާ ކުރާ ކަމަށްވެސް ބުނެފައިވެއެވެ.

އެހެންނަމަވެސް ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާ ކުރެވޭ ކަމަށްވެސް މެޓުން ބުންޏެވެ. ދެކުނުގެ ކަނޑުތައް އާދައިގެ ވަރަކަށް ގަދަވި ނަމަވެސް އުތުރާއި މެދުރާއްޖޭގެ ކަނޑުތައް ގަދަވާނެ ކަމަށް ވެސް މެޓުން ބުނެއެވެ.