އިމާރާތަކަށް ހޮޅިދަނޑިއަކުން އަރަން އުޅުނު މީހަކަށް ވެއްޓި އަނިޔާވެއްޖެއެވެ.

ފުލުހުން ބުނީ މާފަންނުގައި ހުންނަ ޖޭޒް ކެފޭގެ ފުރާޅު މައްޗަށް މީހަކު ވެއްޓިގެން އުޅޭ ކަމުގެ މައުލޫމާތު ރޭ 23:14 ހާއިރު ލިބިފައިވާ ކަމަށެވެ. އެމީހާ އެތަނުން ނެގީ އެމްއެންޑީއެފްގެ އެހީތެރިކަމާއެކުގައެވެ.

ފުލުހުން ބުނީ އެމީހާ އަށް ފަރުވާ ދިނުމަށް އޭޑީކޭ ހޮސްޕިޓަލަށް ގެންދިޔަ ކަމަށެވެ. އަދި ފަހުން އޭނާ އައިޖީއެމްއެޗަށް ބަދަލުކޮށްފައިވާ ކަމަށްވެސް ބުންޏެވެ.

އެމީހާ އަކީ އުމުރުން 35 އަހަރުގެ ދިވެހި ފިރިހެނެކެވެ. އޭނާ ފުރާޅު މައްޗަށް ވެއްޓުނީ ޖެހިގެން ހުރި އިމާރާތަކަށް ހޮޅިދަނޑިއަކުން އަރަން އުޅުމުގެ ތެރޭގައި ކަމަށް އެމީހާ ފުލުހުންނަށް މައުލޫމާތު ދެމުން ބުންޏެވެ.