ރާއްޖެ އަށް މިހާރު ކުރަމުން މި އަންނަ ވިއްސާރަ ކުރިޔަށް އޮތް ތިން ދުވަހު ވެސް ކުރާނެ ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން ލަފާކޮށްފިއެވެ.

މެޓު އޮފީހުން ބުނީ ރާއްޖެ ސަރަހައްދުގައި ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރާ ދިމާކޮށް މި ސަރަހައްދުގައި ލޯ ލެވަލް ސާކިއުލޭޝަންއެއް އުފެދިފައިވާ ކަމަށެވެ. އެގޮތުން ވޭތުވެދިޔަ 24 ގަޑިއިރު ރާއްޖޭގެ ބޮޑު ބަޔަކަށް ވިއްސާރަ ކޮށްފައިވާ ކަމަށް މެޓުން ބުންޏެވެ. އަދި ބައެއް ރަށްތަކަށް ބޯކޮށް ވާރޭ ވެހުނު ކަމަށް ވެސް ބުންޏެވެ.

މެޓުން ބުނީ އެންމެ ގިނައިން ވާރޭ ވެހުނު ކަމަށް ރިކޯޑު ކުރެވިފައި ވަނީ އައްޑޫ ސިޓީ ހިތަދޫ އަށް ކަމަށެވެ. އެއީ 110 މިލިމީޓަރުގެ ވާރޭއެވެ.

މެޓުން ވަނީ ހުރިހާ ފަރާތްތަކަކުން ވެސް މޫސުމަށް ސަމާލުކަން ދިނުމަށް އިލްތިމާސް ކޮށްފައެވެ.