ވަގު ލިޔެކިޔުންތަކެއް ހުށަހަޅައިގެން، ހުޅުމާލެ ދެ ވަނަ ފިޔަވަހިން ހިލޭ ގޯތި ހޯދަން އުޅުނު މައްސަލައާ ގުޅިގެން، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ސަސްޕެންޑްކޮށްފިއެވެ.

އެމްޑަބްލިއުއެސްސީން ގޯތި ވައްކަމާ ގުޅިގެން، ފުލުހުން ކުރިއަށް ގެންދާ ތަހުޤީޤަށް ޖާގަދީ ފުރިހަމަޔަށް އެހީތެރިވުމުގެ ގޮތުން ޑެޕިޔުޓީ މެނޭޖިން ޑިރެކްޓަރުގެ ޒިންމާ ތަކަކުން ވަކިކޮށް، އޮފީހަށް ނުނިކުމެވޭ ގޮތަށް ފަޒީލް މިއަދު ސަސްޕެންޑްކޮށްފައިވާ ކަމަށެވެ.

މިއީ ކުންފުނީގެ ބޯޑުން ނިންމި ކަމެއް ކަމަށް އެ ކުންފުނިން ބުންޏެވެ.

"ބިންވެރިޔާ ސްކީމު"ގެ ދަށުން ފަޒީލު ގޯއްޗަށް ޝަރުތު ހަމަނުވާ ކަމަށް ކަނޑައަޅާފައިވަނިކޮށް، އެޗްޑީސީއަށް ވަގު ލިޔެކިޔުންތަކެއް ހުށަހަޅައިގެން ހުޅުމާލެ ދެ ވަނަ ފިޔަވަހިން ގޯތި ހޯދަން އުޅުނު މައްސަލަ ފެންމަތިވީ ސޯޝަލް މީޑިއާމެދުވެރިކޮށެވެ.

ނަމަވެސް ފަޒީލްގެ ބޭބެ، އަދި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވީ އެކަން އެންމެ ފުރަތަމަ ފާހަގަވީ މީގެ ހަ މަސް ކުރިން، މިދިޔަ ޖޫން މަހު ކަމަށާއި އެކަން ހިނގާފައިވާ ގޮތް ބެލުމަށް ހައުސިން މިނިސްޓްރީއަށް ހުށަހެޅުއްވި ކަމަށެވެ.

ވަގު ލިޔުންތަކެއް ހުށަހަޅައިގެން އެއް ބިމަކަށް ދެ ބޭފުޅަކު ކުރިމަތިލައްވާފައިވާކަން އެނގިހުރެ، ވޭތުވެދިޔަ ހަ މަސް ދުވަހު އެކަން ސިއްރު ކުރައްވައި، ފުލުހުންނަށް ހުށަނާޅުއްވައި ހުންނެވުމުން، ފަޒުލް މަސައްކަތް ކުރެއްވީ ބޭބެގެ މަސްލަހަތު ހިމާޔަތް ކުރެއްވުމަށް ކަމަށް ބެލުމުގެ ޖާގަ އެބަ އޮތެވެ.

އެ މައްސަލައާ ގުޅިގެން ފުލުހުން އިއްޔެ ވަނީ އެޗްޑީސީއަށް ވަދެ، އެތަން ބަލައިފާސްކޮށްފައެވެ.

ކޮރަޕްޝަންގެ މި މައްސަލައާ ގުޅިގެން، އެޗްޑީސީގެ މެނޭޖިން ޑިރެކްޓަރުގެ މަގާމުން ފަޒުލްއާ އެކު އެ ކުންފުނީގެ ބޯޑުގެ 10 މެމްބަރަކު ވަނީ ސަސްޕެންޑްކޮށްފައެވެ. އެ ބޯޑުގައި މިހާރު އިންނެވީ އެޗްޑީސީގެ ޗެއާމަން އަހުމަދު ނާސިފް އެކަންޏެވެ.