ރ. އަތޮޅު ކައުންސިލު އިދާރާއަށް ސިހުރު ހެދިކަމުގެ ތުހުމަތުގައި ރ. އުނގޫފާރުން ދެ މީހަކު ހައްޔަރުކޮށްފިއެވެ.

އެ މައްސަލައިގައި ހައްޔަރު ކުރީ އުނގޫފާރު، ނަސީމީހިޔާ، މުހައްމަދު ވަހީދު، 67، އާއި އެ ރަށު ރިވެލި، މުހައްމަދު އަމްޖަދު، 61، ކަމަށެވެ.

ފުލުހުން މިއަދު ބުނީ އެ ދެ މީހުން ވެސް ކޯޓު އަމުރެއްގެ ދަށުން ހައްޔަރުކުރީ މި މަހުގެ 21ވަނަ ދުވަހު ކަމަށެވެ. އެ ދެ މީހުންގެ ބަންދަށް ކޯޓުން 15 ދުވަސް ޖަހާފައިވާ ކަމަށްވެސް ބުންޏެވެ.

ރާއްޖޭގައި އައިސް ސިހުރު ހެދުމުގެ ކަންކަން ވަނީ ވަރަށް ބޮޑުވެފައެވެ. ފުލުހުން އަންނަނީ މިފަހުން މިފަދަ ކަންކަން ބޮޑަށް ކުރާ ކަމަށް ފާހަގަކުރެވޭ ރަށްތަކަށް ގޮސް އޮޕަރޭޝަންތައް ވެސް ހިންގަމުންނެވެ.