ހުޅުމާލެ ފޭސް އެކެއްގައި ވަގުތީ މިސްކިތެއް މީގެކުރިން ހުރި ބިމުގައި 2000 މީހުންގެ ޖާގައިގެ މިސްކިތެއް އިމާރާތް ކުރުމަށް މިއަދު ބިންގާ އަޅައިފިއެވެ.

އެ މިސްކިތުގެ ބިންގާ އަޅައި ދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

މަދީނާ އިންވެސްޓްމަންޓްގެ މެނޭޖްމަންޓުގެ ދަށުން އިމާރާތްކުރާ މި މިސްކިތަކީ، މ. ތައިބާ ފަޟީލަތުއްޝައިހް އިސްމާއިލު މުހައްމަދުގެ ދީލަތި އެހީގައި ބިނާކުރެވޭ މިސްކިތެކެވެ. ދެ ފަންގިފިލާއަށް ޢިމާރާތްކުރާ، ދެހާސް މީހުންގެ ޖާގައިގެ މި މިސްކިތް ނިސްބަތްކުރެވިފައިވަނީ ކީރިތި ރަސޫލާގެ އަނބިކަނބަލުން އާއިޝަތުގެ ފާނަށެވެ.

ހުޅުމާލެ ފޭސް އެކެއްގައި މީގެކުރިން ވަގުތީ މިސްކިތުގައި 2000 މީހުންގެ ޖާގައިގެ މިސްކިތެއް އިމާރާތް ކުރުމަށް ބިންގާ އެޅުމުގެ ރަސްމިއްޔާތުގެ ތެރެއިން: ފޮޓޯ | ރައީސް އޮފީސް

ރިސާޗް ލައިބްރަރީއަކާއެކު ބިނާކުރާ އެ މިސްކިތުގައި އަންހެނުންނަށް ނަމާދު ކުރެވޭ ޖާގައަކާއި، އަންހެނުންނަށް ހާއްސަ ފާހާނައެއް ވެސް ހިމެނުމަށް ވަނީ ހަމަޖެހިފައެވެ.

އަދި މި މިސްކިތުގައި ކަރަންޓު އުފެއްދުމަށް ނިންމާފައިވަނީ، އިރުގެ ހަކަތަ ބޭނުންކޮށްގެންނެވެ.