ހުސްވެފައިވާ ސުޕްރީމް ކޯޓުގެ ފަނޑިޔާރުކަމުގެ މަގާމަށް ހައިކޯޓުގެ އިސް ފަނޑިޔާރުގެ މަގާމުގައި މިވަގުތު ހުންނެވި ހުސައިން ޝަހީދު އައްޔަން ކުރުމަށް ޖުޑީޝަރީ ކޮމެޓީން ފާސްކޮށްފިއެވެ.

ސުޕްރީމް ކޯޓުގެ ފަނޑިޔާރުކަމުގެ މަގާމު ހުސްވެފައި ވަނީ އެ ކޯޓުގެ ފަނޑިޔާރުކަމުގެ ހުންނެވި ހުސްނުއް ސުއޫދު މަގާމުން އިސްތިއުފާ ދެއްވުމުންނެވެ. ހުސްނުއް ސުއޫދު އިސްތިއުފާ ދެއްވީ ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަމުން ގެންދާ މައްސަލައަކާއި ގުޅިގެން ސަސްޕެންޑު ކޮށްފައި ވަނިކޮށެވެ.

ސުއޫދު އިސްތިއުފާ ދެއްވުމުން ޖޭއެސްސީން ސުޕްރީމް ކޯޓުގެ ފަނޑިޔާރު ކަމުގެ މަގާމަށް ކުރިމަތިލާން ހުޅުވާލިއެވެ. އެ ފަހަރު ކުރިމަތިލެއްވީ ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިހާޔަތު އެކަންޏެވެ. އެހެންކަމުން ޖޭއެސްސީން އަލުން އިއުލާން ކުރިއެވެ.

މިފަހަރު ތިން ބޭފުޅަކު ކުރިމަތިލެއްވިއެވެ. މި ތިން ބޭފުޅުންގެ ތެރޭގައި ހައިކޯޓުގެ އިސް ފަނޑިޔާރު ޝަހީދުގެ އިތުރުން ކުރީގެ ޑެޕިއުޓީ ޕްރޮސިކިއުޓަރު ޖެނެރަލް ނިހާޔަތު ހިމެނިވަޑައިގަންނަވައެވެ. މަޖިލީހަށް ރައީސް ޑރ. މުހައްމަދު މުއިއްޒު ފޮނުއްވީ ޝަހީދުގެ ނަންފުޅެވެ.

ކޮމިޓީގެ ބައްދަލުވުމުގައި ނިންމީ ޖޭއެސްސީން ޝަހީދުގެ ނަން ދިރާސާތައް ކޮށްފައިވާތީ އިތުރު ދިރާސާއެއް ކުރުމެއް ނެތި ރުހުން ދިނުމަށެވެ. އެގޮތަށް ކޮމިޓީގެ ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުން ޝަހީދުގެ ނަން ފާސްކުރިއެވެ.

ޝަހީދަކީ މިސްރުގެ އަލްއަޒުހަރު ޔުނިވާސިޓީ އާއި ކުއްލިޔަތުއް ދިރާސާތިލް އިސްލާމިއްޔާއިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލު ކުރެއްވުމަށް ފަހު ދިވެހިރާއްޖޭގެ އިސްލާމީ ޔުނިވާސިޓީން މާސްޓާ އޮފް އިސްލާމިކް ޖުޑީޝަލް ސައިންސް އެންޑް ޝަރީއާ ޕޮލިސީ ހާސިލް ކުރައްވައިގެން ހުންނެވި ބޭފުޅެކެވެ.

އަށާރަ ނޮވެންބަރު 2022ން ފެށިގެން ދިވެހިރާއްޖޭގެ ހައިކޯޓުގެ އިސްފަނޑިޔާރުގެ މަސްއޫލިއްޔަތުތައް ވަގުތީ ގޮތުން ހަވާލު ކުރައްވާފައި ވަނީ ފަނޑިޔާރު ޝަހީދުއާއެވެ. ދިވެހިރާއްޖޭގެ ހައިކޯޓުގެ އިސްފަނޑިޔާރުގަކަމުގެ މަގާމަށް ޝަހީދު އައްޔަން ކުރައްވާފައިވަނީ 2023 ވަނަ އަހަރުގެ އޮކްޓޫބަރު މަހުގެ 30 ވަނަ ދުވަހުއެވެ.