މާލޭގެ ބޮޑުތަކުރުފާނު މަގުގެ އުތުރު ފަރާތް ޒަމާނީ ފެންވަރަކަށް ތަރައްގީ ކުރުމަށް އެމްޓީސީސީއާ ހަވާލުކޮށްފިއެވެ.

ހައުސިން މިނިސްޓްރީގައި މިއަދު ބޭއްވި ސޮއި ކުރުމުގެ ރަސްމިއްޔާތެއްގައި އެމްޓީސީސީގެ ފަރާތުން އެ އެއްބަސްވުމުގައި ސޮއި ކުރެއްވީ އެކުންފުނީގެ މެނޭޖިން ޑިރެކްޓަރު ޑީސީޕީ (ރޓޔޑ) އަހްމަދު ސައުދީއެވެ. ހައުސިން މިނިސްޓްރީގެ ފަރާތުން ސޮއިކުރެއްވީ މިނިސްޓަރު މުއްތަލިބެވެ.

އެ މަސައްކަތް އެމްޓީސީސީއާ ހަވާލުކުރީ 455 ދުވަސް ތެރޭގައި މަސައްކަތް ހަވާލުކުރާ ގޮތަށެވެ. އެ މަސައްކަތް އެކުންފުންޏާ ހަވާލުކުރީ 144 މިލިއަން ރުފިޔާއަށެވެ.

އެ މަޝްރޫއުގެ ދަށުން ބޮޑުތަކުރުފާނު މަގުގެ އުތުރު ފަރާތުގެ 830 މީޓަރުގެ މަގުގައި ތާރު އަޅާނެއެވެ. ތާރު އަޅާނީ ހެންވޭރުގައި ހުންނަ ހުޅުމާލެ ފެރީ ޓާމިނަލުން ފެށިގެން ލޯކަލް މާރުކޭޓާއި ހަމައަށެވެ.

މީގެއިތުރުން ފެން ހިންދާ ނިޒާމު ގާއިމް ކުރުމާއި ރޯޑް މާކިން އާއި ސައިން ބޯޑު ހަރުކުރުމުގެ އިތުރުން ދުވާރުތައް ވެސް ހެދުން ހިމެނެއެވެ.