ހެންވޭރު ގުދަނެއްގެ ފުރާޅުމަށްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝީދުގެ މައްސަލާގައި އޭނާއާ ސުވާލު އާއިލާއިން އެއްބާރުލުން ދީފައި ނުވާ ކަމަށާއި ތަހުގީގަށް ބޭނުންވާ މައުލޫމާތު ހޯދުމަށް ދެން މަސައްކަތް ކުރާނީ މެލޭޝިއާ ފުލުހުންނާ ގުޅިގެން ކަމަށް ފުލުހުން ބުނެފިއެވެ.

ފުލުހުން މިއަދު ނެރުނު ބަޔާނުގައި ބުނީ ޔުމްނުއަށް ފަރުވާ ދެމުންދިޔަ މެލޭޝިއާ ހޮސްޕިޓަލް ބަދަލުކުރި އިރު ވެސް އެ މައުލޫމާތު ފުލުހުންނާ ހިއްސާކޮށްފައި ނުވާ ކަމަށެވެ.

ފުލުހުން ބުނީ ޔުމްނު އިތުރު ފަރުވާއަށް މެލޭޝިއާއަށް ގެންދިޔަ ދުވަހުން ފެށިގެން ދެ ފުލުހަކު މެލޭޝިއާގައި ތިބި ކަމަށާއި އޭގެ ތެރެއިން އެއް ފުލުހަކީ މެޑިކަލް ޑޮކްޓަރެއް ކަމަށެވެ.

"ފުލުހުންގެ ތަހުގީގު ޓީމުން މިއަދާ ހަމައަށް ވެސް މަސައްކަތް ކުރަމުން ދިޔައީ އާއިލާގެ ފަރާތުން އެއްބާރުލުން ލިބޭނެ ކަމުގެ އުންމީދުގައެވެ. ނަމަވެސް އެއްބާރުލުން ލިބިފައި ނުވާތީ މެލޭޝިއާގެ ގާނޫނާއި ގަވާއިދާ އެއްގޮތްވާ ގޮތުގެ މަތިން، ތަހުގީގަށް ބޭނުންވާ މައުލޫމާތު ހޯދުމަށްޓަކައި މެލޭޝިއާ ފުލުހުންނާ ގުޅިގެން މަސައްކަތް ކުރަމުން ގެންދާ ވާހަކަ ދަންނަވަމެވެ." ފުލުހުންގެ ބަޔާނުގައިވެއެވެ.