ސަރުކާރާ ދެކޮޅަށް އެމްޑީޕީން މިރޭ ކުއްލި އެއްވުމަކަށް ނުކުންނަން ތައްޔާރުވަމުން ދަނިކޮށް، އެމްޑީޕީ ހަރުގެއަށް ކަރަންޓުދީފައިވާ ކޭބަލެއް ބަޔަކު ބުރިކޮށްލައިފިއެވެ.

އެމްޑީޕީ ގައުމީ މަޖިލީހުގެ މެމްބަރު އަންވަރު އިބްރާހިމް ވިދާޅުވީ ޗާންދަނީމަގުގައި ހުންނަ އެ ޕާޓީގެ ހަރުގެއަށް ކަރަންޓު ދީފައިވާ ކޭބަލް ބުރުކޮށްލާފައި ވަނީ، ސްޓެލްކޯ ޑިސްޓްރިބިއުޝަން ފޮށްޓަކުން ކަމަށެވެ. އެކަންކޮށްފައި ވަނީ މިއަދު ހަވީރު 5:40 އެހާކަންހާއިރު ކަމަށް އަންވަރު ވިދާޅުވިއެވެ.

ސްޓެލްކޯގެ މީޑިއާ އޮފިޝަލަކު "ހަތާވީސް"އަށް މިރޭ ވިދާޅުވީ ޗާންދަނީމަގުގައި ހުރި އެ ކުންފުނީގެ ކަރަންޓް ޑިސްޓްރިބިއުޝަން ފޮއްޓެއްގެ ތިރި ހަލާކުކޮށްލައިގެން، ކޭބަލްތަކެއް ބުރިކޮށްފައިވާތީ، އެކަން ހައްލުކުރުމުގެ މަސައްކަތް ކުރަމުންދާ ކަމަށެވެ. އޭނާ ވިދާޅުވި ގޮތުގައި ކޭބަލް ބުރިކޮށްގެން ވަގަށް ގެންގޮސްފައިވާ ކަމަށް ބެލެވެއެވެ.

ހަރުގެއަށް ކަރަންޓު ދީފައިވާ ކޭބަލް ބުރިކޮށްލާފައި ވަނީ ކުއްލި އެއްވުމަކަށް ނުކުންނަން ހަރުގޭގައި ތައްޔާރުވަމުން ދަނިކޮށެވެ.

ކޭބަލް ބުރިކޮށްލުމުން، އެ ސަރަހައްދުގެ ފަސް ގެއަކުން ކަރަންޓު ވަނީ ކެނޑިފައެވެ.

އެމްޑީޕީން މިރޭ 8:30ގައި ކުއްލި އެއްވުމަކަށް ނުކުންނަނީ ދައުލަތުގެ މުއައްސަސާތަކަށް ނުފޫޒު ފޯރުވައި ރައްޔިތުންގެ ހައްގުތަކަށް ސަރުކާރުން އަރައިގަންނަމުންދާ ކަމަށް ބުނެ އެކަމާ ދެކޮޅަށެވެ.