ގެދޮރުވެރިޔާގެ މަޝްރޫއުން ވަކި ބަޔަކަށް ނާޖާއިޒު މަންފާ ހޯދައިދިން ކަމަށް ބުނެ ދައުވާ ކުރަނީ ފްލެޓްތައް ހަވާލުކުރުން ލަސްކުރަން ކަމަށް އެމްޑީޕީން ބުނެފިއެވެ.

ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ހިންގި ހައުސިން މަޝްރޫއުއާ ގުޅިގެން އޭރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާއި އެ މިނިސްޓްރީގެ އޭރުގެ ތިން ވެރިއެއްގެ މައްޗަށް ދައުވާކުރަން އެންޓި ކޮރަޕްޝަން ކޮމިޝަން (އޭސީސީ) ވަނީ ޕީޖީ އޮފީހަށް ފޮނުވައިފަ އެވެ.

އެކަމާ ގުޅިގެން އެމްޑީޕީން ނެރުނު ބަޔާނުގައި ބުނީ އެއްވެސް އަސްލެއް ނެތް ހިޔާލީ ތަހުގީގެއްގެ މައްޗަށް ބިނާކޮށް ދައުވާ އުފުލަމުން ދަނީ ފްލެޓުތައް ހަވާލުކުރުން ލަސްކުރުމުގެ ބޭނުމުގައި ކަމަށެވެ. އަދި އެކަން ކުރަނީ ސަރުކާރާއި ރައީސް ޑރ. މުހައްމަދު މުއިއްޒުގެ އޯޑަރަށް އޭސީސީ މެދުވެރިކޮށް ކަމަށާއި އޭސީސީން އަމަލުކުރަނީ އިޖްރައާތުތަކާ ހިލާފަށް ކަމަށާއި އޭގެ ބޭނުމަކީ ފްލެޓްތައް ދިނުން ލަސްކުރުން ކަމަށް ވެސް އެމްޑީޕީން ނެރުނު ބަޔާނުގައިވެއެވެ.

މި ދައުވާތަކަކީ ކުރިއަށް އޮތް އިންތިހާބުތަކާ ހަމައަށް ފްލެޓް ދިނުން ލަސްކޮށް އިންތިހާބަށް ނުފޫޒު ފޯރުވުމަށް ފްލެޓްތައް ބޭނުން ކުރުމުގެ ނުބައި ނިޔަތުގައި ސަރުކާރުގެ ނުފޫޒުން އުފުލާ ދައުވާތަކެކެވެ.
އެމްޑީޕީގެ ބަޔާން

އެމްޑީޕީގެ ބަޔާނުގައި ވަނީ ވަކި ބަޔަކަށް މަންފާ ހޯދައިދިން ކަމަށް ބުނެ ދައުވާ އުފުލަން ނިންމުމަށްފަހު މި ސަރުކާރުން ވެސް ފްލެޓު ދޭން ނިންމާފައިވަނީ ކުރީގެ ސަރުކާރުން ޝާއިއުކުރި ލިސްޓަށް ކަމަށެވެ.