ސިންގަޕޫރަށް ކުރެއްވި ރަސްމީ ދަތުރުފުޅުގައި ދެގައުމުން ކުރިޔަށް ގެންދިޔަ މަޝްވަރާތަކުން ގުޅުން އިތުރަށް ބަދަހިވެގެން ދާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް ސިންގަޕޫރަށް ވަޑައިގަތީ މިދިޔަ މަހުގެ 29ވަނަ ދުވަހުއެވެ. ދަތުރުފުޅު ނިންމާލެއްވީ މިއަދުއެވެ. އެކްސްގައި ރައީސް ވަނީ ދަތުރުފުޅާއި ގުޅިގެން ޕޯސްޓެއް ކުރައްވަވައިފައެވެ.

އެމަނިކުފާނު ވިދާޅުވީ އެ ދަތުރުފުޅުގެ ސަބަބުން ދެގައުމުގެ ގުޅުން އިތުރު ހަރުފަތަކަށް ގެންދެވިއްޖެ ކަމަށެވެ. އަދި އެގައުމުގައި ބޭއްވި އިންވެސްޓުމަންޓު ފޯރަމްއާއެކު ވެސް ވިޔަފާރީގެ ދާއިރާ އިން ގިނަ ފުރުސަތުތަކެއް ހުޅުވިގެން ގޮސްފައިވާ ކަމަށް ވެސް ވިދާޅުވިއެވެ.

މި ދަތުރުފުޅުގައި ރާއްޖެ އާއި ސިންގަޕޫރާއި ދެމެދު ތިން އެއްބަސްވުމެއްގައި ވެސް ސޮއި ކޮށްފައިވެއެވެ.

ސޮއި ކުރެވުނު އެއްބަސްވުންތައް:

  • ގާބިލުކަން ބިނާކުރުމުގެ ދާއިރާއިން އެއްބާރުލުންދިނުމާ ގުޅޭގޮތުން ދިވެހި ސަރުކާރާއި ސިންގަޕޫރު ސަރުކާރާ ދެމެދު ވެވޭ ފަހުމުނާމާ
  • ދިވެހިރާއްޖޭގެ ފަތުރުވެރިކަމާއި ތިމާވެއްޓާ ބެހޭ ވުޒާރާ އާއި ސިންގަޕޫރުގެ މިނިސްޓްރީ އޮފް ސަސްޓެއިނަބިލިޓީ އެންޑް އެންވަޔަރަމަންޓާ ދެމެދު ވެވޭ ފަހުމުނާމާ
  • މަތީ ތައުލީމާއި، ތައުލީމީ ސިޔާސަތާއި، ފަންނީ އަދި ވޮކޭޝަނަލް ތައުލީމާއި ދިރާސާގެ ދާއިރާއިން އެއްބާރުލުންދިނުމާ ގުޅޭ ގޮތުން، ދިވެހިރާއްޖޭގެ މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވުޒާރާ އާއި ސިންގަޕޫރުގެ އިންސްޓިޓިއުޝަން އޮފް ޓެކްނިކަލް އެޑިއުކޭޝަނާ ދެމެދު ވެވޭ ފަހުމުނާމާ

މިއަހަރަކީ ދިވެހިރާއްޖެ އާއި ސިންގަޕޫރާ ދެމެދު ޚާރިޖީ ގުޅުން ޤާއިމުކުރިތާ 50 އަހަރު ފުރުމުގެ މުނާސަބާ ފާހަގަކުރާ އަހަރުކަމަށް ވާތީ، ދެ ގައުމުގެ 50 އަހަރުވީ ގުޅުމުގެ މައްޗަށް އަލިއަޅުއްވާލައްވައި އެކުލަވާލައްވާފައިވާ ހާއްސަ ފޮތެއް، ރައީސުލްޖުމްހޫރިއްޔާ ވަނީ، ސިންގަޕޫރުގެ ރައީސަށް ހަދިޔާކުރައްވާފައެވެ.