ދިވެހިރާއްޖޭގެ ގައުމީ ޚިދުމަތުގެ ޕްރޮގްރާމު (މޯލްޑިވްސް ނޭޝަނަލް ސާވިސް) ގައި ބައިވެރިވުމަށް 1244 ޒުވާނުން ކުރިމަތިލާފައިވާކަމަށް ދިފާއީ ވުޒާރާއިން މިއަދު ހާމަކޮށްފިއެވެ.

ދިފާއީ ވުޒާރާއިން މިއަދު ނެރުނު ބަޔާނުގައި ބުނެފައިވަނީ، މި ޕްރޮގްރާމަކީ ދިވެހި ގައުމިއްޔަތަށް ލޯބިކުރާ، ހުރިހާ ގޮތަކުން ދުޅަހެޔޮ، މަސައްކަތަށް އަހުލުވެރި، އަޚްލާގު ރަނގަޅު ޒުވާން ޖީލެއް ބިނާކުރުމަށް ރައީސް ޑރ. މުހައްމަދު މުއިއްޒު އިސްނަންގަވައިގެން ކުރިއަށް ގެންދަވާ ޕްރޮގްރާމެއް ކަމަށެވެ.

މި ޕްރޮގްރާމުގައި ބައިވެރިވާ ޒުވާނުންނަށް ޖިސްމާނީގޮތުންނާއި ސިއްހީގޮތުން ދުޅަހެޔޮކަން ހޯދައިދިނުމަށް އަމާޒުކޮށްގެން ހާއްސަ ތަމްރީނުތަކެއް ކުރިއަށް ގެންދާނެ ކަމަށް ވުޒާރާއިން ބުނެފައިވެއެވެ. އަދި ޕްރޮގްރާމުގައި ބައިވެރިވާ ކޮންމެ ފަރާތަކަށްވެސް ޕްރޮގްރާމް ފުރިހަމަކުރުމުގެ ފުރުސަތު ދޭނެކަމަށް ބަޔާނުގައި ފާހަގަކޮށްފައިވެއެވެ.

ކުށުގެ ވެށިން ކުޑަކުދިން ދުރުކުރުމަށް ސަރުކާރުން ފަށާފައިވާ އެންމެ ބޮޑު މަސައްކަތަކީ ގައުމީ ޚިދުމަތުގެ ޕްރޮގްރާމު ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ. މި ޕްރޮގްރާމުގެ ސަބަބުން ޒުވާނުންގެ މެދުގައި އިޖުތިމާއީ ރޫހު އާލާވެ، ގައުމަށް ޚިދުމަތްކުރުމުގެ ޝައުގުވެރިކަން އިތުރުވެގެންދާނެ ކަމަށް ބެލެވެއެވެ.