މާލެ އާއި ހުޅުމާލޭގެ ބައެއް ފިހާރަތަކުން މުދާ ގަތުމަށްފަހު ވަގު ސްލިޕް ފޮނުވައިގެން ހައްޔަރުކުރި، ދެ މީހުން ދޫކޮށްލައިފިއެވެ.

އެ މައްސަލާގައި ހައްޔަރު ކޮށްފައި ވަނީ ޒައިދާން މުހައްމަދު ހާޝިމް އާއި އަފްރިން އަކްތަރު ނަމަކަށް ކިޔާ އަންހެނެކެވެ. މިއީ ދެމަފިރިންނެވެ.

ފުލުހުން ބުނީ 2025 މެއި މަހުގެ އެކި ދުވަސް މަތިން، ހުޅުމާލޭގައި ހުންނަ ފިހާރައަކުން ސައްހަ ނޫން ސްލިޕްތަކެއް ފޮނުވައިގެން މުދާ ގަނެފައިވާ މައްސަލަ މެއި 16 ވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ.

އެ މައްސަލައިގެ ތަހުގީގުގައި ފުލުހުން ބެލިބެލުމުން ޒައިދާން މުޙައްމަދު ހާޝިމް، މާލޭގައި ހުންނަ އިތުރު ދެ ފިހާރައަކުން ވެސް ސައްހަ ނޫން ސްލިޕް ފޮނުވައިގެން މަކަރާއި ހީލަތުން މުދާ ހޯދާފައިވާކަން ތަހުގީގަށް އެނގިފައިވާ ކަމަށް ފުލުހުން ބުންޏެވެ.

އެ މައްސަލައިގެ ތަހުގީގުގައި އިތުރަށް ބެލިބެލުމުން، ސައްހަ ނޫން ސްލިޕް ފޮނުވައިގެން 36467 ރުފިޔާގެ ތަކެތި މަކަރާއި ހީލަތުން ހުޅުމާލޭގައި ހުންނަ ފިހާރައިން ހޯދާފައިވާކަމާއި މާލޭގައި ހުންނަ ފިހާރައަކުން ސައްހަ ނޫން ސްލިޕް ފޮނުވައިގެން 31150 ރުފިޔާގެ ތަކެތީގެ އިތުުރުން މާލޭގައި ހުންނަ އެހެން ފިހާރައަކަށް ސައްހަ ނޫން ސްލިޕް ފޮނުވައިގެން 5817 ރުފިޔާގެ ތަކެތި ވަނީ ހޯދައިފައެވެ.

ފުލުހުން ބުނީ ޒައިދާންގެ ދެމަފިރިން އެކި ފިހާރަތަކުން ވިޔަފާރިކުރި މައްސަލަތަކުގައި ގެއްލުންވި 80،000 އަށް ވުރެ ގިނަ ރުފިޔާ ވެރިފަރާތްތަކަށް އަނބުރާ ހޯދައި ދިނުމަށްފަހު އެ ދެ މީހުން އިތުރަށް ބަންދުކުރަން ނުފެންނާތީ މިހާރު ބަންދުން ދޫކޮށްލާފައިވާ ކަމަށެވެ.