ޖިނާއީ މައްސަލަތަކުގައި އެއްބާރުލުން ދިނުމަށް ރާއްޖެ އިން ސްރީލަންކާ އާއެކު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއި ކޮށްފައި މިވަނީ ލަންކާގެ ރައީސް ޑިސަނަޔަކެ ރާއްޖެއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ޖިނާއީ ކުށްތައް ހުއްޓުވުމަށް ދެގައުމުގެ އެހީތެރިކަމާއި އެއްބާރުލުން ދިނުމުގެ އެއްބަސްވުމުގައި ދިވެހި ސަރުކާރުން ސޮއިކުރެއްވީ ހާރިޖީ ވަޒީރު ހަލީލެވެ. އަދި ސްރީލަންކާ ސަރުކާރުގެ ފަރާތުން ސޮއިކުރެއްވީ އެ ގައުމުގެ ހާރިޖީ ވަޒީރެވެ.

މި އެއްބަސްވުމަކީ 2011ވަނަ އަހަރުން ފެށިގެން ދެގައުމުން ސޮއި ކުރުމަށް މަސައްކަތް ފަށާފައިވާ އެއްބަސްވުމެކެވެ.

އެ އެއްބަސްވުމާއި ގުޅޭ ގޮތުން ފޮރިން މިނިސްޓްރީން ބުނީ އެ އެއްބަސްވުމުގެ ބޭނުމަކީ ދެގައުމުގެ ދެމެދުގައި އޮތް ޒަމާންވީ ގުޅުން ދެމެހެއްޓުމާއެކެ، ޖިނާއީ ކުށްތައް ހުއްޓުވުމަށް ދެގައުމުގެ އެހީތެރިކަމާއި އެއްބާރުލުން ދިނުން ކަމަށެވެ.

އެ މުއާހަދާގެ ދަށުން، އެގައުމެއްގެ ގާނޫނުތަކާއި ގަވާއިދުތަކާ އެއްގޮތްވާގޮތުގެ މަތިންނާއި އެ މުއާހަދާގެ މާއްދާތަކާ އެއްގޮތްވާގޮތުގެ މަތިން، ދެވެން އޮތް އެންމެ ފުޅާ ދާއިރާއެއްގައި ޖިނާއީ މައްސަލަތަކުގަ އެހީތެރިކަން ދޭންޖެހޭނެއެވެ.

ރާއްޖޭގައި އެކަމާބެހޭ މައި އިދާރާއަކީ ޕްރޮސެކިއުޓާ ޖެނެރަލްގެ އޮފީހެވެ.

މީގެއިތުރުން އެ ރަސްމިއްޔާތުގައި ސޮއިކުރައްވާފައިވާ އިތުރު އެއްބަސްވުންތަކުގެ ތެރޭގައި ފޮރިން ސާވިސް އިންސްޓިޓިއުޓް އާއި ބަންޑާރަނަޔަކަ އިންޓަނޭޝަލް ޑިޕްލޮމެޓިކް ޓްރޭނިން އިންސްޓިޓިއުޓް އާއި ދެމެދު ވެވޭ މެމޮރެންޑަމް އޮފް އަންޑަސްޓޭންޑިން އޮން ޑިޕްލޮމެޓިކް ޓްރޭނިން އެންޑް އެކްސްޗޭންޖް އޮފް އިންފޮމޭޝަން އެންޑް ޑޮކިއުމަންޓްސް ހިމެނެއެވެ.