ވެލާނާ އިންޓަޝޭނަލް އެއާޕޯޓް (ވީއައިއޭ) ގައި އިއްޔެ ބޭންކް އޮފް މޯލްޑިވްސް (ބީއެމްއެލް) ގެ މުވައްޒަފުންތަކެއްގެ އަތުން ފޭރުނު ފައިސާ ހުރި ބްރީފްކޭހެއް ފޭރުނު މައްސަލައިގައި ހައްޔަރުކުރި މީހުންގެ ވަނަވަރު ފުލުހުން ހާމަކޮށްފިއެވެ.

މި މައްސަލައާ ގުޅިގެން އެ ފައިސާތައް ފޭރިގަތުމަށްފަހު ފިލަން އެރި ލޯންޗު ވަނީ ފުލުހުންގެ ބެލުމުގެ ދަށަށް ގެނެސްފައެވެ.

ފުލުހުން މިއަދު ބުނީ އެ މައްސަލައިގެ ތުހުމަތުގައި ހައްޔަރުކުރި ހަތަރު މީހުންނަކީ ރޭޝަމް / ލ.މާވަށް، މާޒިން މޫސާ (25އ) އާއި މ. ކޯރަސް / މާލެ، އަޙްމަދު ރައިހާން ނަޢީމް (20އ)، އަޅިވިލާގެ / ކ.ގުރައިދޫ، އިބްރާހީމް އަނޫފް (24އ) އަދި އަޅިވިލާގެ / ކ.ގުރައިދޫ، ޙުސައިން ޝަހުދު (30އ) އެވެ.

އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 5 ދުވަހަށް ބަންދުކުރުމަށް ވަނީ އަމުރުކޮށްފައެވެ.

ތަހުގީގު ކުރިއަށް ދިޔަ މިންވަރަކުން މީޑިއާއަށް ހާމަކުރެއްވުންހުރި މައުލޫމާތު ހާމަ ކުރަމުން ގެންދާނެ ކަމަށް ފުލުހުން ބުންޏެވެ. ފޭރުނު ފައިސާތައް އަދިވެސް ހޯދިފައި ނުވާކަން "ހަތާވީސް" އަށް ވަނީ ކަށަވަރުވެފައެވެ.

މޫނު ނިވާކޮށްގެން ތިބި ބަޔަކު އެއާޕޯޓްގެ ކުރީގެ ޓާމިނަލަށް ދިޔަ ބީއެމްއެލްގެ މުވައްޒަފުންގެ އަތުން ފޭރުނު މައްސަލަ ފުލުހުންނަށް ރިޕޯޓު ކޮށްފައި ވަނީ is މިމަހުގެ 26ވަނަ ދުވަހުގެ ރޭ ފަތިހު 4:45 ގައެވެ ފޭރިގެންފައި ވަނީ 100،000 އަށް ވުރެ ގިނަ ޑޮލަރެވެ.