ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ދިވެހިރާއްޖެއިން ޖަޕާނަށް ކަނޑައަޅާފައި ހުންނަވާ ސަފީރު ކަމަށް، އަހްމަދު މަހްލޫފް މިއަދު ޢައްޔަންކުރައްވައިފިއެވެ.މަހްލޫފް ސަފީރުކަމަށް އައްޔަންކުރެއްވީ، އެކަމަށްޓަކައި މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައެވެ.

ނިމިދިޔަ އެމްޑީޕީ ސަރުކާރުގެ ޔޫތު މިނިސްޓަރުގެ މަގާމު ފުރުއްވި މަހްލޫފަށް ޖަޕާނުގައި ހުންނަ ސަފީރުކަން ދެއްވާފައި މިވަނީ، ވެރިކަން ކުރާ ޕީއެންސީ އަށް ސޮއިކުރިތާ މަހެއްވެސް ނުވަނީހެވެ.

މަހްލޫފް ޕީއެންސީ އަށް ސޮއިކުރެއްވީ މިދިޔަ މަހުގެ 14ވަނަ ދުވަހުގެ ރޭ ޕީއެންސީން ބޭއްވި ބޮޑު އެއްވުމުގައެވެ.

މަހްލޫފު އެމްޑީޕީން ވަކިވެވަޑައިގަތީ މިދިޔަ ސެޕްޓެމްބަރު މަހުގެ 8ވަނަ ދުވަހުއެވެ.

އެމްޑީޕީގެ ޗެއާޕާސަން ފައްޔާޒު އިސްމާއީލަށް މަހްލޫފް ފޮނުއްވި ސިޓީއެއްގައި ވަނީ އެމްޑީޕީން އޭނާ ވަކިވުމަށް އެދިފައިވާތީ އެޕާޓީން ވަކިކޮށްދިިނުމަށް އެދިވަޑައިގަންނަވާ ކަމަށް ވިދާޅުވެފައެވެ.

އެމްޑީޕީ ގައުމީ މަޖިލީހުގެ ވަޓްސްއަޕް ގްރޫޕަށް މަހްލޫފު ފޮނުއްވި މެސެޖެއްގައި ވިދާޅުވީ އެމްޑީޕީން ވަކިވަނީ ދައުލަތުގެ މަގާމަކަށް ދިއުމުގެ ގޮތުން ކަމަށެވެ.