މިވަގުތު ޗުއްޓީގައި އޮތް ރައްޔިތުން މަޖިލީހުން ދައުރުން ބޭރު ޖަލްސާއެއް ބާއްވަން ނިންމައިފިއެވެ.

މި ޖަލްސާ އޮތީ މާދަމާ ހެނދުނު 9:00ގައެވެ. ޖަލްސާގެ އެޖެންޑާ ވެސް މިހާރު ވަނީ މަޖިލީހުން އާއްމު ކޮށްފައެވެ.

މި ޖަލްސާގެ އެޖެންޑާގައި އޮތް އެންމެ ބޮޑު އެއް ކަމަކީ ގާނޫނުއަސާސީ އަށް އިސްލާހު ގެނައުމުގެ ބިލުގެ މަސައްކަތެވެ. އެ ބިލު ހުށަހަޅުއްވަނީ އިނގުރައިދޫ ދާއިރާގެ މެންބަރު އިބްރާހީމް ފަލާހެވެ.

އެހެންނަމަވެސް އެ ބިލުގެ ތަފްސީލެއް އަދި ނޭނގެއެވެ. މި ބިލުގެ އިތުރުން ގާނޫނުއުގޫބާތަށް ހިތަދޫ މެދު ދާއިރާގެ މެންބަރު އަހުމަދު އަޒާން ހުށަހަޅުއްވާފައިވާ ބިލުގެ ފުރަތަމަ ކިޔުން ވެސް މާދަމާގެ ޖަލްސާއަށް އެޖެންޑާ ކޮށްފައިވެއެވެ.