އިދިކޮޅު އެމްޑީޕީގެ އެތެރޭގައި ހިޔާލު ތަފާތުވުންތައް ހުރި ނަމަވެސް އެކަންކަން އެއްފަރާތް ކުރުމަށްފަހު އެކުގައި މަސައްކަތް ކުރެވޭނެ ފަދަ ގާބިލްކަން އެޕާޓީގެ ކިބާގައި އެބަހުރި ކަމަށް ވަގުތީ ޗެއާޕާސަންގެ މަގާމުގައި ހުންނެވި އަބްދުލް ޣަފޫރު މޫސާ (ގަޕޯ) މިރޭ ވިދާޅުވެއްޖެއެވެ.

މިރޭ ވަނީ އެމްޑީޕީގެ ގައުމީ މަޖިލީހުގެ ކުއްލި ބައްދަލުވުމެއް ބާއްވައިފައެވެ. އެ ބައްދަލުވުން ބާއްވާފައި ވަނީ ސިއްރު ބައްދަލުވުމެއްގެ ގޮތުގައެވެ. މިރޭގެ ބައްދަލުވުމުގައި ނަޝީދަށް ގައުމީ މަޖިލީހުން ފުރުސަތު ދިނުމަށް ފާސްކުރީ ގައުމީ މަޖިލީހުގެ 61 މެންބަރުންގެ ވޯޓުންނެވެ.

ގައުމީ މަޖިލީހުގެ ކުއްލި ބައްދަލުވުމެއް މިރޭ ބާއްވާފައި މިވަނީ އެމްޑީޕީގެ އެތެރޭގައި ހިޔާލު ތަފާތުވުންތަކެއް އުފެދި އެ ހިޔާލު ތަފާތުވުންތައް ހައްލު ކުރެވުމާއި ގުޅިގެންނެވެ.

އެމްޑީޕީގެ އެތެރޭގައި ހިޔާލު ތަފާތުވުންތައް އައިސްފައި ވަނީ ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިހާބާއި ރައްޔިތުންގެ ފެންނަ ނުފެންނަ ވޯޓުން އެމްޑީޕީއަށް ލިބުނު ކާމިޔާބީ ފާހަގަކުރުމަށް ރޭ އާޓްފިޝަލް ބީޗުގައި ބޭއްވި ޖަލްސާގައި ކުރީގެ ރައީސް މުހައްމަދު ނަޝީދަށް ވާހަކަދައްކަވަމުން ފުރުސަތު ނުދެއްވަން ނިންމި ހިސާބުންނެވެ.

އެއާއެކު ނަޝީދު ވަނީ ޖަލްސާ ވެސް ބޮއިކޮޓް ކުރައްވާފައެވެ. ނަމަވެސް ނަޝީދަށް ހާއްސަކޮށްފައިވާ ގޮނޑިއެއް އެ ޖަލްސާގައި ހުއްޓެވެ. އަދި ކުރީގެ ޗެއާޕާސަން ފައްޔާޒު އިސްމާއީލަށް ވެސް ހާއްސަކޮށްފައިވާ ގޮނޑިއެއް ހުރި ނަމަވެސް ފައްޔާޒުވެސް އެ ޖަލްސާގައި ބައިވެރިވެވަޑައެއް ނުގަންނަވައެވެ.

ނަމަވެސް އެމްޑީޕީގެ އިސް ލީޑަރުން މަޝްވަރާތައް ކުރުމަށްފަހު މިހާރު އެ މައްސަލަ ވަނީ ހައްލުކޮށްފައެވެ. އަދި ގައުމީ މަޖިލީހުން ނަޝީދަށް ފުރުސަތު ދޭން ނިންމިއިރު ދާއިމީ ޗެއާޕާސަން އެއް އިންތިހާބުވަންދެން ހަ މެންބަރުންގެ އިންޓަރިމް ކޮމެޓީއެއް ނެގުމަށް ވެސް ވަނީ ފާސްކޮށްފައެވެ.

އެ ބައްދަލުވުމަށްފަހު "ހަތާވީސް"އާ ވާހަކަދައްކަވަމުން ގަޕޯ ވިދާޅުވީ އެމްޑީޕީގެ އެތެރޭގައި އެއްވެސް ހިޔާލު ތަފާތުވުންތަކެއް ނެތް ކަމަށެވެ. އެތެރޭގައި އުފެދުނު ހިޔާލު ތަފާތުވުންތައް އެއްފަރާތް ކުރުމަށްފަހު މިހާރު އެންމެން ވެސް ތިބީ އެކުގައި މަސައްކަތް ކުރުމަށް ތައްޔާރަށް ކަމަށް އޭނާ ވިދާޅުވިއެވެ.

"މިރޭ ގައުމީ މަޖިލީހުން މި ނިންމީ އަޅުގަނޑުމެންގެ ތެރޭގައި އުފެދުނު ހިޔާލު ތަފާތުވުންތައް އެފަރާތްކޮށް މިޕާޓީގެ މަގުސަދަށްޓަކައި ނިންމި މުހިއްމު ނިންމުމެއް،" ގަޕޯ ވިދާޅުވިއެވެ.

އޭނާ ވަނީ އެމްޑީޕީގެ ހުރިހާ މެންބަރުންވެސް "ގަދަކޮށް" ޕާޓީގައި ތިބުމަށް އިލްތިމާސް ކުރައްވަވައިފައެވެ.